Трамп ва унинг оиласи ўтган йиллар учун солиқ даъволаридан бутунлай озод этилди

Қарор Трампнинг солиқ декларациялари сизиб чиқиши бўйича Солиқ хизматига қарши даъвосини ҳал этиш доирасида қабул қилинди.

Фото: Julia Demaree Nikhinson/AP

АҚШ Адлия вазирлиги Солиқ хизматига (IRS) АҚШ президенти Доналд Трамп ва унинг оила аъзоларининг ўтган йиллардаги солиқ декларацияларини текширишни тақиқлади.

Қарор Трампнинг солиқ декларациялари сизиб чиқиши бўйича Солиқ хизматига қарши даъвосини ҳал этиш доирасида қабул қилинди. Трамп даъво доирасида Солиқ хизматидан 10 миллиард доллар талаб қилган.

CNN нашрининг таъкидлашича, дастлаб Адлия вазирлиги даъвони ҳал этиш доирасида аввалги президент маъмурияти даврида ноқонуний таъқибга учраган Трамп тарафдорларига товон тўлаш учун 1,8 миллиард долларлик жамғарма ташкил этилишини эълон қилди. Трампнинг ўзидан расман узр сўралади, аммо пул компенсацияси тўланмайди.

Адлия вазирлиги сайтида эълон қилинган ҳужжатга кўра, АҚШ ҳукумати Трампга нисбатан солиқ даъволаридан воз кечмоқда ва «ҳар қандай даъво қўзғатиш ҳуқуқидан бутунлай маҳрум бўлмоқда».

Адлия вазирлигининг тушунтиришича, декларацияларни текширишни тақиқлаш фақат ўтган йилларга тааллуқли бўлиб, Трамп ва унинг оила аъзолари келажакда топширадиган солиқ ҳисоботларига тааллуқли эмас.

Солиқлар бўйича кичик қўмитага раҳбарлик қилувчи демократ конгрессмен Ричард Нил Трампнинг солиқ декларацияларини текширишни тақиқлаш қарорини «коррупция» деб атади.

Трамп ўзининг биринчи сайловолди кампанияси пайтида ҳам, президентлик лавозимига киришганидан кейин ҳам солиқ декларацияларини эълон қилмади ва буни молия аудитининг давом этаётгани билан изоҳлади. У 1970-йилларнинг бошидан бери солиқларни тўлаш тўғрисидаги маълумотларни ошкор қилишдан бош тортган биринчи АҚШ президенти бўлди.

Трампнинг Солиқ хизматига қарши даъвоси 2026 йил январь ойида берилган эди. Судга мурожаат қилишга сабаб, Трампнинг 2018-2020 йилларда президентлик лавозимидаги биринчи муддати давомида Америка оммавий ахборот воситаларида солиқ декларацияларининг эълон қилиниши бўлди. Ҳужжатлар газеталарга Солиқ хизматининг собиқ ходими Чарлз Литтлжон томонидан тақдим этилган. 2024 йилда у солиқ декларациялари ва улар билан боғлиқ маълумотларни ноқонуний ошкор қилгани учун беш йиллик қамоқ жазосига ҳукм қилинган.