Тошкентда сохта трейдерга алданган йигит банкоматни бузиб, пул олмоқчи бўлди

Йигит ярим тунда банкомат олдига бориб, уни тош билан очишга уринган. Бироқ бунинг уддасидан чиқолмаган ва воқеа жойидан яширган. У сохта трейдернинг пул кўпайтириб бериш ҳақидаги ёлғонига ишониб, бировлардан 10 млн сўм қарз бўлиб қолгани учун шу ишга қўл урганини айтган.

Тошкент шаҳрининг Чилонзор туманида банкоматдан пул ўғирламоқчи бўлган шахс ушланди. Бу ҳақда пойтахт ИИББ ахборот хизмати хабар берди.

Маълум қилинишича, соат тунги 2:30 лар атрофида номаълум шахс Чилонзор тумани ҳудудида ўрнатилган банкоматни очиб, ичидаги пулларни ўғирлаб кетмоқчи бўлган. Бунинг учун у дастлаб банкомат атрофида айланиб, вазиятни ўрганган. Ҳеч ким йўқлигига ишонч ҳосил қилгач, банкоматни бузишга киришган: ердан тош олиб, темир қутини урган ҳолда ичини очмоқчи бўлган.

Бироқ йигит пулларни олишга ҳар қанча ҳаракат қилмасин, бунинг уддасидан чиқолмаган. У банкомат қутисини бузган, аммо қути ичидаги сейфни очолмаган. Сўнгра воқеа жойидан яширинган. Гумонланувчи тезкор-қидирув тадбирлари натижасида қўлга олинган.

“Трейдернинг пулни кўпайтириб беришига ишонган ҳолда 10 млн сўм қарз олиб, ютқазиб қўйдим. Қарзларимни тўлаш мақсадида шу ишни қилгандим. Олдимдан банкомат чиқиб қолди, пулларини олмоқчи бўлдим. Олдини очдим, ичида каттароқ сейф бор экан. Ҳаракат қилиб кўрдим, аммо сейфни очолмаслигимни билдим”, деган йигит.

У қилган ишидан пушаймонда эканини айтиб, кечирим сўраган.

Шу куни сейф ичида 552 млн 400 минг сўм маблағ сақланаётган бўлган. Банкоматга етказилган зарар эса 30 млн сўмни ташкил қилган.

Ҳолат юзасидан Жиноят кодексининг 169-моддаси 4-қисми “а” банди (жуда кўп миқдорда ўғирлик) билан жиноят иши қўзғатилган ва йигитга нисбатан қамоқ эҳтиёт чораси қўлланган. Ҳозирда дастлабки тергов ҳаракатлари олиб борилмоқда.