Google Россиядан ўз серверларининг бир қисмини олиб чиқмоқда

Америка концерни контентни етказиб беришни тезлаштириш учун қўлланадиган Google Global Cache ускуналарининг бир қисмини РФдан чиқаряпти. Серверларни олиб чиқиш 2026 йил январидан бошланиши режалаштирилган.

Фото: picture-alliance/dpa/Google

Google Америка компанияси Россиядаги интернет-провайдерларни ўз серверларининг бир қисмини олиб кетиш нияти ҳақида огоҳлантирган, деб хабар қилди 26 декабр, жума куни РБК агентлиги манбаларига таяниб. Уларнинг айтишича, компания фойдаланувчиларга контентни етказиб беришни тезлаштириш учун ишлатиладиган Dell R720 серверларини эксплуатациядан чиқариб ташлашни режалаштирмоқда.

Гап Google Global Cache тизимида ишлатиладиган ускуналар ҳақида кетмоқда. Бу серверлар YouTube видеоларини, хариталарни, Android иловалари ва Chrome браузери янгиланишларини, шунингдек Google қидирувидаги тасвирларни сақлаш ва узатиш учун қўлланади. Украинада уруш бошланганидан кейин компания Россияда бундай турдаги янги серверларни ўрнатишни тўхтатган.

Хабарномага кўра, ускуналарни эксплуатациядан чиқаришни 2026 йил 26 январдан бошлаш режалаштирилган. Компания бунга сабаб сифатида Dell R720 серверлари ишлаб чиқаришдан олингани ва кафолат муддатига эга эмаслигини кўрсатган. Google, шунингдек, бундай машиналар трафикнинг жуда кичик қисмини қайта ишлашини билдирган. Шу билан бирга, Россияда жойлашган Google Global Cache’нинг қолган серверлари ишлашда давом этади.

Провайдерлардан бири РБК’га Google қўшимча хатда мазкур серверларни ўчиришни, чиқариб олишни ва ускунани олиб кетиш учун манзилни билдиришни сўраганини айтган. Унинг сўзларига кўра, Dell R720 серверларининг бир қисми аллақачон олиб чиқилган. Таъкидланишича, демонтаж ва олиб чиқиш ишлари IT-ускуналарнинг “ҳаёт цикли”ни бошқариш, жумладан демонтаж ва утилизацияга ихтисослашган Европа компанияси — MPK Asset Solutions томонидан амалга оширилмоқда.

Google Украинага Россия қуролли босқинидан кейин Россиядаги тижорий фаолиятини тўхтатган ва офисини ёпган, фақат бепул сервисларини қолдирган. Компаниянинг Россиядаги юридик шахси — ООО “Гугл” 2023 йил октябрда банкрот деб топилган.

Google кетганидан кейин Россиядаги Google Global Cache серверларини модернизация қилмаган. Кейинчалик бу ҳолатдан Роскомнадзор 2024 йил ёзида YouTube ишини секинлаштиришни бошлаганда фойдаланган. Идора Google сервер ускуналарини янгиламагани учун кириш тезлиги пасайганини айтган. Google’нинг ўзи эса буни рад этган.

Кейинроқ Давлат думасининг собиқ депутати Александр Хинштейн (ўша пайтда ахборот сиёсати қўмитаси раҳбари) YouTube’ни секинлаштириш Россия ҳокимияти ташаббуси билан амалга оширилганини айтган. Шундан сўнг Роскомнадзор видеохостингни “қонунчиликни кўп марта бузиш” ва мамлакатга “ҳурматсизлик”да айблаган.

2025 йил декабр ойида Давлат думаси ахборот сиёсати қўмитаси раиси ўринбосари Андрей Свинцов YouTube Россияда яқин 6–12 ой ичида тўлиқ блокланиши мумкинлигини билдирган.