Ёқутистонда иситиш учун кўмир тугаб бормоқда

Ёқутистоннинг бир қатор туманлари (улуслари)даги қозонхоналарда биноларни иситиш учун кўмир захиралари деярли қолмаган. Республика коммунал хўжалиги ва энергетика вазири Вячеслав Емелянов пайшанба куни, 25 декабрда бўлиб ўтган брифингда маълум қилишича, гап олти туман ҳақида кетмоқда: бу ерларда ёқилғи захиралари камайиб бораётган бўлса-да, уларни тўлдиришнинг иложи бўлмаяпти. Бу ҳақда “Люди Байкала” нашрининг “ЛБ Поток” янгилик лойиҳаси хабар беради.

Ёқутистон вазирининг сўзларига кўра, қишлоқ ва посёлкаларни иситиб берадиган компанияларда қарзлар тўпланиб қолган — уларда кўмир разрезларига ва ташувчиларга ўз вақтида тўлаш учун маблағ етмаяпти. Қарзларни ёпиш ва ёқилғи етказиб беришни қайта тиклаш учун маҳаллий ҳокимият Молия вазирлигидан субсидиялар тушишини кутмоқда.

Пул етишмаслиги туфайли бутун Ёқутистон бўйлаб иситишда муаммолар юзага келгани ҳақида сентябрнинг биринчи ярмида — биринчи қор ёғганидан кейин ҳам хабар қилинган эди. Республикада ярим йил якунлари бўйича бюджет тақчиллиги 24,4 млрд рублни ташкил этган. Мансабдорлар коммунал хизматлар нархларини оширган ва маҳаллий аҳолини электр, иссиқлик, сув ва газни тежашга чақирган.

2024 йил якунларига кўра, Саха Республикаси (Ёқутистон)даги кўмир корхоналари 49 млн тонна кўмир қазиб олган, натижада ҳудуд илк бор Россияда ушбу ёқилғини қазиб олиш ҳажми бўйича иккинчи ўринга чиққан. 2025 йил декабр ўртасида Ёқутистон саноат ва геология вазири Максим Терещенко республика ҳукумати йил якунларигача рекорд даражада — 50 млн тонна кўмир қазиб олишга умид қилаётганини айтган.

РФ Энергетика вазирлиги Кўмир саноати департаменти директори вазифасини бажарувчи Дмитрий Лопатин ноябр ойида Россияда кўмир тармоғи корхоналарининг 74 фоизи зарар билан ишлаётганини тан олган.