Косово сайловлари: ҳукмрон партия ғалаба қозонди

Косовода ҳукмрон “Ўзлигини белгилаш” партияси мамлакат бош вазири Албин Курти раҳбарлигида навбатдан ташқари парламент сайловларида ишончли ғалаба қозонди. Приштинадаги Марказий сайлов комиссияси якшанба, 28 декабр куни, деярли барча сайлов участкаларидан овозлар санаб чиқилганидан сўнг маълум қилишича, “Ўзлигини белгилаш” 49,8 фоиз овоз тўплаган.

Шу тариқа, партия янги чақириқ парламентдаги ўринларнинг қарийб ярмига эга бўлади ва бир қатор этник озчилик вакиллари билан бирга ҳукуматда кўпчиликни таъминлай олади, деб прогноз қилмоқда koha.net портали.

Dpa агентлиги хабар беришича, ҳукмрон партия тарафдорлари ғалабани нишонлаш учун Приштина кўчаларида автокортеж билан айланиб, сигнал чалган. Шаҳар устида фейерверклар ҳам учирилган. Куртининг ўзи овоз беришни “ҳалол, демократик ва эркин” деб атади. Янги мандат муносабати билан ҳукумат олдида кўп вазифалар турганини, “яхши ишни давом эттириш зарур” эканини қўшимча қилди.

Мухолифатдаги “Косово Демократик партияси” ва “Косово Демократик лигаси” мос равишда 21 фоиз ва 13,6 фоиз натижа билан иккинчи ва учинчи ўринларни эгаллаган. Тўртинчи ўринда — собиқ бош вазир Рамуш Харадинайга тегишли консерватив “Косово келажаги учун алянс” бўлиб, у 7,6 фоиз овоз олган.

120 ўринли парламентда серб озчилигига 10 та ўрин ажратилган, бошқа этник гуруҳларга яна 10 тадан ўрин тўғри келади.

Косово парламентига жорий сайловлар — йил бошидан буён иккинчиси. 9 феврал куни бўлиб ўтган мунтазам сайловлардан сўнг 50 ёшли Курти мухолифатдаги ҳеч бир партия билан коалиция тузиш бўйича келишолмаган ва мутлақ кўпчиликни таъминлай олмаган эди.

Албин Курти ҳукумати Косовонинг асосан шимолида яшайдиган серб озчилигига нисбатан қатъий йўналишни ушлаб келмоқда — минтақада давлат назоратини кенгайтирмоқда. Хусусан, серб валютаси (динор)дан фойдаланиш ҳамда Белграднинг ижтимоий тўловларига боғлиқ бўлган косоволик серблар учун Сербиядан пул ўтказмаларини амалга ошириш тақиқланган. Бу Европа Иттифоқи ва АҚШда норозилик уйғотган, шунингдек Приштина билан Белград ўртасидаги алоқаларнинг янада кескинлашишига олиб келган.

ЕИ Косоводаги бир қатор лойиҳаларни молиялаштиришни тўхтатишга қарор қилди ва уларни қайта тиклаш учун шартлар қўйди — Приштинадан мамлакат шимолидаги кескинликни пасайтириш бўйича қадамлар талаб қилинган. АҚШ ҳам USAID (АҚШ Халқаро тараққиёт агентлиги) орқали Косоводаги турли лойиҳаларни молиялаштиришни 90 кунга музлатган.

Декабр ойи ўртасида Косово расман Европа Иттифоқига аъзо бўлиш учун ариза топширди. Сербия эса бундай аризани 2009 йилда берган. ОАВ маълумотларига кўра, Ғарб ҳар икки давлатга ҳам евроинтеграция истиқболлари уларнинг ўзаро муносабатларни тартибга солишдаги ютуқларига бевосита боғлиқ эканини англатган. ЕИнинг беш давлати — Испания, Кипр, Греция, Словакия ва Руминия ҳали ҳам, Сербия ва яна бир қатор давлатлар, жумладан Россия каби, Косовонинг Сербиядан мустақиллигини тан олмайди.