Вучич Сербияда 2026 йилда муддатидан олдин сайлов ўтказишга ваъда берди

Сербия президенти Александр Вучич 2026 йилда Халқ скупшчинасига (бир палатали парламент) навбатдан ташқари сайловлар ўтказилишини тасдиқлади. Вучичнинг бу сўзларини якшанба, 28 декабр куни серб ОАВ, жумладан Beta агентлиги ҳамда Vreme ва Telegraf онлайн-нашрлари келтирди.

Парламент биноси олдида ўз тарафдорлари олдида чиқиш қилган сиёсатчи ҳукумат норозилик акциялари иштирокчиларига қарши эмас, улар томон қадам ташлаётганини айтди. “Яқин вақт ичида, келаси йилда, биз сайловларга борамиз”, — деди у, бироқ овоз беришнинг аниқ саналарини айтмади.

Шу билан бирга Александр Вучич келгусида ҳукмрон коалиция ишончли ғалаба қозонишига ишонч билдирди ва яқинда бешта муниципалитетда бўлиб ўтган сайловларни эслади — у ерда ҳукумат тарафдорлари устун келган. Амалдаги парламент таркибининг ваколатлари 2027 йил декабрда тугаши керак.

Давлат раҳбари қўшимча қилишича, Белградда Халқ скупшчинаси ёнидаги норозиларнинг палаткали лагери 3–4 январга қадар йиғиштириб олинади, унинг ўрнида янги йил байрамлари билан боғлиқ объектлар жойлаштирилади. “Рангли инқилоб муваффақиятсизликка учради”, — деди Вучич.

Сербия президенти муддатидан олдин сайловлар ҳақида декабр ўрталарида гапирган эди, ўшанда у “2026 йил охири”ни тилга олган.

28 декабр куни Сербияда норози талабалар бутун мамлакат бўйлаб муддатидан олдин парламент сайловларини ўтказиш талаби қўллаб-қувватланиши учун имзо тўплаш бўйича кенг кўламли акция ўтказди. Ташкилотчилар маълумотига кўра, имзолар 113 та аҳоли пунктида йиғилган.

Нови-Сад шаҳрида 2024 йил 1 ноябр куни яқинда таъмирланган темирйўл вокзалининг ташқи бетон соябони қулаган. Натижада 6 ёшдан 74 ёшгача бўлган 16 киши ҳалок бўлган. Фожиадан кейин қурилиш вазири лавозимида ишлаган Горан Весич истеъфога чиққан. Кейинроқ у ва вокзални реконструкция қилиш билан боғлиқ яна 12 нафар шахс қўлга олинган.

Шунга қарамай, мамлакатда 1996 йилдан бери энг йирик деб аталган норозилик намойишлари тўлқини кўтарилди. Намойишчилар Нови-Саддаги фожианинг сабаби сифатида коррупция, бепарволик, қурилишда хавфсизлик қоидаларига эътиборсизлик, шунингдек серб ҳокимиятидаги қариндош-уруғчиликни келтирган.

Январ ойида норозиликлар фонида Сербия бош вазири, Нови-Саднинг собиқ мэри Милош Вучевич истеъфога чиққан. Март ойида мамлакат парламенти бу қарорни тасдиқлаган. Янги ҳукумат раҳбари этиб тиббиёт профессори Журо Мацут тайинланган — унинг номзодини Сербия президенти Александр Вучич таклиф этган. Кейинроқ Вучич “демократик мамлакатлар норозиликлар пайдо бўлган ҳар сафар сайлов тақвимини ўзгартирмаслиги керак”, чунки бу “фуқароларнинг ўзларига зарар келтириши”ни айтган.