Оролбўйи ўрмонзорлари 2,3 млн гектаргача кенгайтирилади

Стратегия лойиҳасида экотизимларни сақлаш ва табиий ресурслардан барқарор фойдаланиш йўналишида ўрмонлар майдонини ошириш асосий вазифалардан бири сифатида қайд этилган. Хусусан, ерларни эрозиядан асраш, мелиорация объектларини қум кўчишидан ҳимоя қилиш учун иҳота дарахтзорларини кўпайтириш, шу билан бирга ўрмон билан қопланган умумий майдонни кенгайтириш режалаштирилган.

Лойиҳада келтирилган мақсадли кўрсаткичлар қуйидагича:

• ерларни эрозиядан ва мелиорация объектларини қум кўчишидан сақлаш учун иҳота дарахтзорларини 30 055 гектарга етказиш;
• республикада ўрмон билан қопланган майдонларни 6,1 миллион гектарга етказиш;
• дарахт ва буталарни кўпайтириш учун ҳар йили 1500 тонна уруғ тайёрлашни таъминлаш.

Шу билан бирга, лойиҳада Орол денгизи қуриши натижасида юзага келган экологик муаммолар таъсирини юмшатиш ва Оролбўйи минтақасида яшаш шароитини яхшилашга қаратилган чора-тадбирлар алоҳида блок сифатида кўрсатилган. Мақсад — минтақада кўкаламзорлаштириш ишларини кенгайтириш орқали қум-туз кўчишини камайтириш ва экотизим барқарорлигини ошириш.

Оролбўйи бўйича режалаштирилаётган кўрсаткичлар:

• Оролбўйи минтақасида 600 минг гектар яшил майдонларни барпо этиш;
• Оролбўйи минтақасидаги ўрмонзорларни 2,3 миллион гектарга етказиш;
• Орол денгизи ҳудудида яшил майдонларнинг умумий ҳажмини 2,6 миллион гектарга ёки ҳудуднинг 80 фоизига етказиш;
• “Яшил иқлим” ва Глобал экологик жамғармаларнинг биохилма-хиллик, иқлим ўзгариши ва тупроқ емирилишининг олдини олишга қаратилган дастурлари асосида 30 млн доллар қийматидаги лойиҳаларни амалга ошириш.

Лойиҳага кўра, ўрмонларни кенгайтириш ва Оролбўйини кўкаламзорлаштириш бўйича белгиланган чоралар ер деградацияси хавфини пасайтириш, чанг-туз бўронлари таъсирини юмшатиш ҳамда минтақанинг экологик барқарорлигини мустаҳкамлашга хизмат қилиши кутилмоқда.