Ишингер: Россия европаликлар билан эмас, АҚШ билан музокарага қизиқяпти

Европаликларнинг Россия ҳукумати билан тўғридан тўғри музокара олиб бориши ҳозирги пайтда маъносиз, деб ҳисоблайди Волфганг Ишингер. У 2026 йилда форум васийлик кенгаши билан келишилган ҳолда Мюнхен хавфсизлик конференцияси (MSC) раиси вазифасини вақтинча бажармоқда. Ишингер Reuters агентлигига берган ва жума куни, 9 январда эълон қилинган телевизион интервюсида тушунтиришича, Россиянинг юқори лавозимли сиёсатчилари бир неча бор европаликлар улар учун “АҚШнинг шунчаки вассаллари” эканини англатган ва, эҳтимол, Москва фақат АҚШ билан музокарадан манфаатдор.

Унинг айтишича, шу сабабли у 2026 йил 13–15 феврал кунлари бўлиб ўтадиган Мюнхен хавфсизлик конференциясига Россия ҳукумати вакилларини таклиф қилмаган. Ишингер таъкидлашича, улар барибир келмасди ва конференция иштирокчиларининг “90 фоизи томонидан қарсак эмас, балки қарши позиция билан кутиб олинган” бўлар эди. “Афсус, аммо ҳозирги пайтда Россия ҳукумати вакилининг конференцияда бўлиши унчалик маънога эга эмас”, — деди у.

Ишингер Франция президенти Эммануэл Макроннинг Кремл раҳбари Владимир Путин билан тўғридан тўғри музокара ўтказиш таклифига ҳам шубҳа билан қарашини Reuters’га маълум қилди.

Шу билан бирга, Волфганг Ишингер келажакда Германия ёки европаликлар билан Россия томони ўртасида мазмунли музокаралар қайтадан имкониятга айланишига умид билдирди. Бу, унинг фикрича, Россия ҳукуматини Мюнхен хавфсизлик конференциясига яна таклиф қилишга йўл очиши мумкин. “Аммо, афсуски, ҳозир биз ҳали бу босқичда эмасмиз”, — деди у. Ишингер тушунтиришича, у бу йил ҳам конференция учун “жиддий интеллектуал, сиёсий ёки ҳарбий тажриба”га эга бўлган, бироқ “классик мухолифлар” қаторига кирмайдиган россиялик вакилларни топишга жуда уринган, аммо бундайларни топа олмаган.

Айни вақтда MSC раҳбари вазифасини вақтинча бажараётган Ишингер Мюнхендаги форумга Эрон ташқи ишлар вазири Аббос Арағчи таклиф қилинганини айтди, бироқ унинг иштирок этиши ҳали тасдиқланмаган.

Волфганг Ишингер фикрича, Украинада деярли тўрт йилдан бери давом этаётган Россия уруши фонида Германия ҳукумати ўзининг шарқий қўшниси — Полшага қўшимча қурол-яроғни топшириши шарт. Унинг таъкидлашича, ЕИ ва НАТОдаги бу ҳамкор ҳозир “деярли фронт давлати”га айланган ва шу билан ўтган асрнинг 90-йиллари бошида — “совуқ уруш” тугагунга қадар Германия бажарган ролга ўхшаш вазифани ўтамоқда.

“Биз Полшадаги дўстларимизга мудофаа қобилиятини мустаҳкамлаш учун буларнинг барчасини текин берсак бўлади”, — деди Ишингер. У мисол сифатида “масалан, сувости кемаси, фрегат ёки эҳтимол қандайдир ҳарбий ускуна”ни тилга олди. Унинг фикрича, бундай сиёсий ишора Германия ҳукумати учун “пул талаб қилади”, аммо “сиёсий ақл нуқтаи назаридан ниҳоятда яхши инвестиция” бўлади.

2026 йилги Мюнхен хавфсизлик конференциясида ўнлаб давлат ва ҳукумат раҳбарлари, шунингдек ташқи ишлар ва мудофаа вазирлари иштирок этиши кутилмоқда. Конференциянинг янги раиси — НАТО собиқ бош котиби Йенс Столтенберг. Бироқ у Норвегия Молия вазирлиги раҳбарлигига қайтгани сабаб, жорий йилда форумга Волфганг Ишингер раҳбарлик қилади. Ишингер MSC'га 2008–2022 йилларда раислик қилган.