АҚШ ўз фуқароларини Эронни зудлик билан тарк этишга чақирди

Қўшма Штатлар ўз фуқароларини мамлакатдаги норозилик намойишлари ва Вашингтоннинг эҳтимолий зарбалари фонида Эронни «зудлик билан» тарк этишга чақирди. Бундай хабар АҚШнинг Теҳрондаги виртуал элчихонаси сайтида эълон қилинди.

«АҚШ фуқаролари интернетдаги узилишлар давом этишини ҳисобга олиб, муқобил алоқа воситаларини режалаштиришлари ва агар бу хавфсиз бўлса, Эрондан қуруқлик орқали Арманистон ёки Туркияга чиқиш имкониятини кўриб чиқишлари керак. <...> Эрондан чиқиб кетишнинг АҚШ ҳукуматининг ёрдамига боғлиқ бўлмаган режасини ишлаб чиқинг», – дейилади хабарда.

Агар АҚШ фуқаролари Эрондан чиқиб кета олмаса, унда улар ўз уйларида қолиши, намойишлардан четда туриши, шунингдек, озиқ-овқат, сув, дори-дармон ва бошқа зарур нарсаларни ғамлаб қўйиши керак, дейилади хабарда.

2025 йил 15 июнда ҳам АҚШнинг Теҳрондаги виртуал элчихонаси сайтида Эрондаги америкаликларга қаратилган худди шундай хабар эълон қилинганди. 22 июнга ўтар кечаси Вашингтон Эрондаги ядровий объектлар бўйлаб зарбалар йўллади.

2025 йил декабр ойи охиридан буён Эронда ҳукуматга қарши кенг кўламли норозилик намойишлари бўлиб ўтмоқда. ОАВ ва ҳуқуқ фаолларига кўра, Эрон ҳукумати намойишларни куч билан бостиришга ҳаракат қилмоқда, полиция билан тўқнашувларда юзлаб кишилар ҳалок бўлгани ва минглаб кишилар ҳибсга олингани ҳақида хабарлар келмоқда. Эронда рўй бераётган воқеалар бўйича тасдиқланган маълумотлар йўқ, мамлакатда бир неча кундан буён интернет ўчириб қўйилган.

Доналд Трампнинг сўзларига кўра, АҚШ намойишчиларга куч ишлатаётгани туфайли Эрон билан муносабатларда қандай йўл тутиш бўйича бир неча «ўта қаттиқ» вариантларни кўриб чиқмоқда. The New York Times нашри ёзишича, бу вариантлар орасида – Эрон бўйлаб зарбалар ҳам кўзда тутилган.