АҚШ: Ғазода ўт очишни тўхтатишнинг иккинчи босқичи бошланди

АҚШ президентининг махсус вакили Стивен Уиткофф 14 январ, чоршанба куни Ғазо секторида ўт очишни тўхтатишнинг иккинчи босқичига ўтилганини эълон қилди.

“Бугун биз президент (АҚШ президенти Доналд) Трамп номидан Ғазодаги можарони тўхтатиш бўйича 20 банддан иборат президент режасининг иккинчи босқичи бошланганини — ўт очишни тўхтатишдан демилитаризация, технократик бошқарув ва қайта қуриш ишларига ўтишни эълон қиламиз”, — деб ёзди Уиткофф X ижтимоий тармоғида.

Махсус вакил сўзларига кўра, иккинчи босқич Ғазода ўтиш даври маъмуриятини ташкил этиш ва Ғазони бошқариш бўйича Миллий қўмита (NCAG)ни тузиш, шунингдек, ноқонуний қуролли тузилмалар аъзоларини қуролсизлантиришни ўз ичига олади.

Уиткофф АҚШ ҲАМАСдан ўз мажбуриятларини тўлиқ бажаришни, жумладан, ҳалок бўлган сўнгги гаровга олинган шахснинг жасадини зудлик билан қайтаришни кутаётганини билдирди. “Бу талаб бажарилмаса, жиддий оқибатларга олиб келади”, — дея огоҳлантирди у.

АҚШ ҲАМАСни қуролсизлантиришда силжиш йўқлиги, шунингдек, гаровга олинганлардан бирининг жасади ҳалигача қайтарилмагани боис Исроил қаршилигига қарамай, кейинги босқич бошланганини эълон қилди.

CNN’нинг қайд этишича, Трамп режасининг иккинчи босқичи, шунингдек, Фаластин полициясини қўллаб-қувватлаш мақсадида Ғазо секторига Халқаро барқарорлаштириш кучлари (ХБК)ни жойлаштиришни ҳам кўзда тутади. Режага биноан, ХБК киритилиши Исроил армиясининг Ғазо секторини тарк этишига ҳам имконият яратиши мумкин.

Декабр ойида Евроиттифоқ ва АҚШда террористик ташкилот деб тан олинган ҲАМАС ҳаракати қатор шартлар бажарилса, қурол ташлашга тайёрлигини билдирган. Жумладан, ҳаракат Исроил қўшинларининг Ғазо сектори ҳудудидан тўлиқ чиқиб кетилишини талаб қилган. “Қуролимиз (мавжудлиги) оккупация ва тажовуз билан изоҳланади. Агар оккупация тўхтаса, бу қурол давлат назоратига топширилади”, — деган ҳаракат етакчиси Халил ал-Ҳайя.

ҲАМАСнинг 2023 йил 7 октябрда Исроилга қилган ҳужуми Яқин Шарқдаги можаронинг кескинлашувига туртки бўлган. Ўшанда жангчилар Исроилга ракета зарбалари бериб, унинг ҳудудига кириб борган, оқибатда тахминан 1200 киши ҳалок бўлган. Шунингдек, улар 250 атрофида одамни гаровга олиб, Ғазо секторига олиб кетган. Кейинчалик гаровдагиларнинг бир қисми алмаштирилган ёки озод қилинган, бир қисми эса ҳалок бўлган.

Бунга жавобан Исроил ҲАМАСга қарши уруш эълон қилди. Ғазо секторидаги қуруқлик амалиёти ва бомбардимонлар натижасида 70 мингдан ортиқ фаластинлик ҳалок бўлган, яна 169 мингдан зиёди яраланган.