Молдова МДҲдан чиқиш жараёнини бошлади

Молдова ҳокимияти республика МДҲда аъзо бўлиб туришини таъминлаб келган учта келишувни бекор қилиш жараёнини бошлади. ТИВ вазири Попшойнинг айтишича, гап ҳамдўстликдан юридик жиҳатдан чиқиш ҳақида кетмоқда, де-факто аъзолик эса аввалроқ тўхтатилган.

Фото: midr.gov.md

Кишинёв Молдованинг Мустақил Давлатлар Ҳамдўстлиги (МДҲ)даги аъзолигига асос бўлиб келган учта асосий келишувни денонсация қилиш жараёнини бошлади. Бу ҳақда душанба, 19 январ куни, Молдова ташқи ишлар вазири Михай Попшой Radio Moldova эфирида маълум қилди. У таъкидлашича, ушбу келишувлар кучини йўқотгандан сўнг расмий ва юридик жиҳатдан “Молдова МДҲ таркибига кирмайди”, шу билан бирга де-факто аъзолик “аллақачон” тўхтатилган.

Молдова бош вазири ўринбосари ва ТИВ раҳбари қайд этишича, гап қуйидаги ҳужжатлар ҳақида кетмоқда: 1993 йил 22 январ куни Минскда имзоланган МДҲ низоми, 1991 йил 8 декабрдаги МДҲни ташкил этиш тўғрисидаги битим, шу битимга 1991 йил 22 декабрда қабул қилинган илова.

Попшойнинг сўзларига кўра, денонсация жараёни аллақачон кетмоқда ва парламент депутатлари тегишли ҳужжатларни янги парламент сессиясининг энг бошида кўриб чиқади.

“Эҳтимол, феврал ўртасигача биз ҳукуматдаги тартиб-таомилларни якунлаймиз, шундан кейин қарор парламент томонидан қабул қилинади”, — деб вазирнинг сўзларини келтиради “Молдпресс” Молдова давлат ахборот агентлиги.

Михай Попшой Молдованинг МДҲдаги аъзолигига оид келишувларни узишни “мамлакатнинг Европа йўналишини мустаҳкамлашдаги муҳим қадам” деб атади.

Молдова ташқи ишлар вазири қўшимча қилишича, умумий ҳисобда Молдова МДҲ билан 283 та келишувни имзолаган; шулардан 71 таси аллақачон денонсация қилинган, яна тахминан 60 таси денонсация жараёнида. Шу билан бирга, Попшойнинг айтишича, Кишинёв Европа йўналишига зид келмаган тақдирда, иқтисодий фойда келтирадиган ёки фуқаролар учун амалий аҳамиятга эга бўлган келишувлардан воз кечиш ниятида эмас.