Испанияда поезд устига девор қулади: машинист ҳалок бўлди

Испания жанубида камида 42 киши ҳаётига зомин бўлган йирик темирйўл фожиасидан бор-йўғи икки кун ўтиб, мамлакатда яна бир темирйўл ҳалокати юз берди — у ҳам ўлим билан якунланди. Каталония ёнғин хизмати вакили Клауди Галярдо сешанба, 20 январ кечқурун хабар беришича, шаҳар атрофида ҳаракатланувчи поезд вагони устига таянч девор қулаб тушиши оқибатида бир киши ҳалок бўлган, яна беш киши эса оғир тан жароҳати олган. Фожиа Барселонадан тахминан 40 километр ғарбда жойлашган Желида шаҳри яқинида содир бўлган.

Каталониядаги шаҳар атрофи поездлари оператори Rodalies de Catalunya маълум қилишича, ҳалок бўлган киши ушбу компания ходими бўлган. EFE агентлиги аниқлашича, гап поезд машинисти ҳақида кетмоқда.

Ҳалокатга сабаб — кучли бўрон оқибатида катта ҳажмли девор парчаси айнан поезд шу жойдан ўтаётганда тўғридан тўғри релсларга қулаб тушгани. Жароҳат олган йўловчиларнинг аксарияти биринчи вагонда бўлган — деворнинг асосий қисми ҳам айнан шу вагон устига қулаган.

Фавқулодда ёрдам хизматида билдирилишича, 37 нафар жабрланувчига ёрдам кўрсатилган, уларнинг кўпчилиги енгил тан жароҳати олган. Бир йўловчини эса эзилиб қолган вагондан чиқариб олишга тўғри келган.

Бундан икки кун олдин, якшанба, 18 январ кечқурун Испания жанубидаги Кордова провинциясида икки тезюрар поезд тўқнашиши натижасида 42 киши ҳалок бўлган эди. Ҳозиргача 37 киши шифохоналарда қолмоқда. Малагадан Мадридга кетаётган Iryo компанияси поезди релсдан чиқиб, қўшни йўлга ўтиб кетган ва у ерда Уэлва томон кетаётган поезд билан тўқнашган.