“Отамнинг ўрнини эгаллайман деган хаёлда юргандим” – “Бахти Ташкентский”нинг ўғли

ИИВ Бахтиёр Қудратуллаевнинг умумий тартибли колонияда жазо муддатини ўтаётган катта ўғли Бекзод Зафаров ҳақида лавҳа эълон қилди. Маҳкум эл орасида “Бахти Ташкентский” номи билан танилган отасининг ўрнини эгаллайман дея хато ўйлаганини билдирган. У колонияда хўжалик, қурилиш ишларини бажараётганини айтган. “Нотўғри ишлар қилган эканман. Битта касб ўрганиб, юртга фойдам тегадиган иш қилган ҳолда оиламнинг бағрида бўлганим минг марта афзалроқ эди”, деган Бекзод Зафаров.

Ички ишлар вазирлиги Бахтиёр Қудратуллаевнинг ўғли Бекзод Зафаров ҳақида колониядан лавҳа тайёрлади. Унда маҳкум колонияда нима ишлар билан банд бўлаётгани ҳақида айтиб ўтган.

Маълум қилишича, Бекзод Зафаров колонияда хўжалик ва қурилиш ишлари билан машғул. Шунингдек, ишлаб чиқариш корхонасида фойдали меҳнатга жалб қилинган.

“Бахтиёр Қудратуллаевнинг катта ўғли бўламан. Қамалмасимдан олдин отамнинг йўналишини ушлайман, ўрнини эгаллайман деган хаёлларда юргандим. Ўйлаганларимнинг ҳаммаси катта хато экан. Колонияга келганимга бир йил бўлди. Хўжалик ишларига, қурилишларга қарашиб тураман. Қолган пайтда ишлаб чиқариш корхонасида цехга ишга чиқаман. У ерда темир-терсак билан иш қиламиз.

Бир йил олдинги ҳаётим билан ҳозирги ҳаётим анча фарқли. Бу ерда Бекзодмисан, Бекмисан, ким бўлсанг ҳам ҳамма учун қонун бир. Жиноят оламининг таниқли шахсларига, жиноят оламига ҳеч ким интилмасин. Бу нарсадан ҳеч қандай фойда йўқ. Эл-юртнинг, ота-онанинг хизматида бўлсин. Жамиятга фойдаси тегадиган инсон бўлсин. Шу нарсани сўрардим”, деган у.

Бекзод Зафаров одам нималарни йўқотганини бошига тушгачгина тушунишини билдирган ва оиласи ҳақида ҳам тўхталиб ўтган.

“Кейинги йил катта ўғлим мактабга чиқади. Дада, тезроқ келинг, сизни соғиндим, деди. Шу гаплари ҳали-ҳамон хаёлимдан кетмайди. Тунлари болаларим тушимга кириб чиқади.

Ўзимнинг мактабга чиқаётган пайтларимни эслаб ва ҳозирги кунда боламни 1-синфга, биринчи қўнғироққа олиб чиқолмаётганим, ота-оналар мажлисида иштирок этолмаётганим, унга дарс машғулотларида қарашмаётганим, олдида суянадиган тоғи бўлиб туролмаётганим алам қилади. Шу нарсалардан афсусдаман. Қизимнинг энди тили чиқяпти, шуларни кўролмаяпман. Ҳамма нарсага одамнинг ўзи айбдор бўлади. Ҳозир кимнидир айблашим хато, айб ўзимда.

Нотўғри ишлар қилган эканман. Битта касб, битта яхши ҳунарни ўрганиб, юртга фойдам тегадиган иш қилган ҳолда оиламнинг бағрида бўлганим минг марта афзалроқ эди”, деган Бекзод Зафаров.

Шунингдек, у чучварани хом санаганини, қонунни билиб, унга амал қилиб яшаш кераклигини айтиб ўтган:

“Қанийди шу вақтни орқага қайтиришнинг иложи бўлганида ҳалол юриб, ҳалол меҳнат қилиб, оила бағрида бўлишни жуда истардим. Чучварани хом санаган эканман. Қонунни билиб, ўшанга амал қилиб яшаш керак экан. Ҳозирги кунда шу нарсалар ҳаммаси оилага, озодликка, ҳалол меҳнат қилиб, тинчлик-омонликда оила даврасида ўтиришга бир фоиз ҳам яқин келмас экан.

Мана, ҳибсхонада 2 йилдан ортиқ ўтирибман. Шуни тушуниб етдимки, ҳибсхонада ош еб, идиш-товоқларингиз тилладан бўлгандан кўра, оила даврасида бир бурда нон еб юрганингиз минг марта афзалроқ экан. Ҳаммадан узр сўрайман. Қилган ишимдан чин кўнгилдан пушаймонман”.

Бекзод Зафаров Бахтиёр Қудратуллаевнинг катта ўғли ҳисобланади. У 1994 йил Тошкент шаҳрида туғилган. Бекзод Зафаров товламачилик ва фирибгарлик жиноятларини содир этгани учун 11 йил муддатга озодликдан маҳрум қилинган.

Бекзод Зафаровнинг укаси Ихтиёр Қудратуллаев 9 йил, отаси Бахтиёр Қудратуллаевга эса 20 йилга озодликдан маҳрум қилиш жазоси тайинланган.