Украинада Януковичга ерни эгаллаб олиш иши бўйича яна 15 йил берилди

Украина олий антикоррупция суди сешанба, 20 январ куни мамлакатнинг собиқ президенти Виктор Януковични Киев вилоятидаги ер участкасини ноқонуний эгаллаб олиш иши бўйича сиртдан 15 йилга озодликдан маҳрум этиш жазосига ҳукм қилди. Бу ҳақда Украина Ихтисослаштирилган антикоррупция прокуратураси (ИАП) ўз Telegram-каналида хабар берди.

Суд Януковични 2007 йилда — у Украина бош вазири бўлган пайтда Киев вилоятидаги Сухолуцкий қишлоқ кенгаши ҳудудида жойлашган, ўрмон-овчилик хўжалиги фондига тегишли 17,5 гектар майдондаги ер участкасини ноқонуний равишда эгаллаб олганликда айбдор, деб топди. Ушбу ернинг тахминий қиймати 22 миллион гривнадан ортиқ деб баҳоланган.

Тергов маълумотларига кўра, собиқ президентнинг шериклари яқин инсонлар орқали Киев вилояти маъмуриятига ўзларига 1 гектаргача бўлган ер участкаларини ажратиб бериш ҳақида аризалар киритган, кейинроқ эса уларнинг мақсадини ўзгартиришни сўраган. Шундан сўнг бу ерлар Янукович назоратида бўлган фирмага ўтказилган. 2009–2011 йилларда мазкур ерда меҳмонхона-ресторан мажмуаси қурилган ва у собиқ президент томонидан шахсий эҳтиёжлар учун фойдаланилган.

ИАП қўшимча қилишича, жиноятда Януковичнинг бир шериги ҳам айбдор деб топилган, бироқ унинг исми очиқланмаган. Шу билан бирга, даъво муддати ўтиб кетгани сабабли у жазодан озод этилган.

2025 йил 28 апрел куни Киевнинг Подолский туман суди Виктор Януковични сиртдан 15 йилга озодликдан маҳрум қилган эди — суд уни давлат чегарасини ноқонуний кесиб ўтишни ташкил этганликда ва дезертирликка ундаганликда айбдор деб топган. У билан бирга Украина Давлат қўриқлаш бошқармаси (ДҚБ) раҳбарининг собиқ ўринбосари (шу билан бирга президент хавфсизлик хизмати собиқ раҳбари) Константин Кобзар ҳам сиртдан 10 йилга ҳукм қилинган.

Украина Бош прокурори идораси баёнотига кўра, прокурорлар судда 2014 йил 23 феврал куни (Олий рада Януковични ҳокимиятдан четлатганидан кейинги кун) собиқ президент президент хавфсизлик хизмати раҳбарининг собиқ бошлиғи ва РФ вакиллари билан тил бириктирган ҳолда ҳаво йўли орқали Украина давлат чегарасини ноқонуний кесиб ўтганини, шунингдек, ўзининг яқин атрофидаги одамлар ва ДҚБ ҳарбий хизматчиларидан камида 20 нафар кишини олиб чиқишни ташкил қилганини исботлаган.

Бу — Украинада Януковичга нисбатан сиртдан чиқарилган иккинчи ҳукм бўлган. Ундан олдин, 2019 йил январ ойида Янукович давлатга хиёнат ва Украинага қарши тажовузкор уруш олиб боришга кўмаклашиш айбловлари билан 13 йилга озодликдан маҳрум қилинган эди. Шунингдек, ўша пайтда ДҚБнинг 15 нафар собиқ ходимига дезертирлик бўйича гумон эълон қилингани ҳам хабар берилган.

Айблов хулосасида айтилишича, Виктор Януковичнинг Украинадан РФга учиб кетиши давлат чегарасининг ҳаво қатнови учун мўлжалланган расмий ўтказиш пунктидан ташқари жойдан амалга оширилган. Собиқ президент ва унинг одамлари Донецк вилояти, Мангуш туманидаги Урзуф қишлоғи четидан учта Россия ҳарбий вертолётида Россиянинг Ейск шаҳридаги ҳарбий аэродромга учиб борган, у ердан эса Қримга йўл олган. У ерда Янукович Россия ҳарбийлари жойлашган ҳудудда бўлгани айтилган.

Таъкидланишича, Севастополда бўлган пайтида у ўз қўриқчиларини дезертирликка ундаган, шундан кейин уларнинг бир қисми билан денгиз йўли орқали Россияга йўл олган. Януковичнинг ҳаракатланиш маршрути Россия махсус хизматлари томонидан мувофиқлаштирилгани ва шахсан РФ президенти Владимир Путин билан келишилгани ҳам қайд этилган.

Россияда бўлган пайтида Янукович оммавий чиқишларида бир неча бор ўзини “қонуний президент” деб атаган, шунингдек, Украинага Россия қўшинларини киритишни сўраб петиция ҳам имзолаган. Аммо Москва Украинада сайланган президент Пётр Порошенкони қонуний давлат раҳбари сифатида тан олганидан кейин Янукович омма олдида кўриниш бериш ва ОАВ билан мулоқот қилишни деярли тўхтатган. Ҳозирда собиқ президент Москва вилоятидаги Барвиха посёлкасида яшайди — бу ҳақда Подолский туман суди йиғилишида прокурор ҳам маълум қилган.

Матнда, шунингдек, “Важные истории” нашри феврал ойи бошида эълон қилган суриштирувга таяниб, Виктор Януковичнинг ўғли — Александр Янукович ўзига яқин компаниялар орқали Россия томонидан эгаллаб олинган Украина ҳудудларидан олинаётган кўмирни сотишдан миллиардлаб рубл даромад қилаётгани айтилади. Журналистлар аниқлашича, 2023–2024 йилларда кичик Януковичга боғлиқ тузилмалар РФдан қарийб ярим миллион тонна кўмир экспорт қилган. Хомашё учун пуллар Британия Виргин оролларидаги офшор ҳисобларига тушган, кўмир эса Туркия ва бошқа мамлакатларга етказиб берилган.