2025 йилда қурилиш соҳаси 14,2 фоиз ўсиш қайд этди

2025 йил январ–декабр ойларида Ўзбекистонда бажарилган қурилиш ишлари ҳажми 313,8 трлн сўмни ташкил этган. Бу кўрсаткич 2024 йилга нисбатан 14,2 фоизга юқори.

Фото: Kun.uz

Миллий статистика қўмитаси эълон қилган дастлабки маълумотларга кўра, 2025 йилда мамлакатда жами 313,8 трлн сўмлик қурилиш ишлари бажарилди. Қайд этилишича, қурилиш соҳасидаги ушбу ҳажм 2024 йилнинг мос даврига нисбатан 14,2 фоизга ўсган.

Маълумотларда қурилиш ишлари ҳажмининг йиллар кесимида барқарор ортиб бораётгани ҳам келтирилган. Хусусан, январ–декабр ойлари натижаларига кўра:

2022 йил — 130,7 трлн сўм;
2023 йил — 222,9 трлн сўм;
2024 йил — 259,6 трлн сўм;
2025 йил — 313,8 трлн сўм.

Шу тариқа, сўнгги тўрт йилда қурилиш ишлари ҳажми изчил ўсиб, 2022 йилдаги 130,7 трлн сўмлик кўрсаткичдан 2025 йилда 313,8 трлн сўмгача кўтарилган.

Қурилиш соҳасидаги ўсиш инфратузилма лойиҳалари, ижтимоий объектлар қурилиши, уй-жой барпо этиш ҳамда ҳудудларни комплекс ривожлантириш ишлари фаоллашуви билан боғлиқ бўлиши мумкин.

Тайёрлаган: Отабек Матназаров

#қурилиш