Германияда Абу-Даби учрашуви натижаларига шубҳа билан қаралди

Немис партиялари вакиллари 23 ва 24 январ кунлари Абу-Дабида бўлиб ўтган Россия, АҚШ ва Украина вакилларининг илк уч томонлама музокаралари ҳақида фикр билдирди. Сиёсатчиларнинг кўпчилиги ҳеч қандай ўзгаришни кўрмаяпти, бир қисми эса “кичик умид учқуни” борлигини айтди. Улар ўз мулоҳазаларини якшанба, 25 январ куни билдирди.

“Яна бир бор Украина бўйича музокаралар натижасиз бўлиб чиқди. Ва яна бир бор айнан Россия ўзининг максималистик талаблари билан ҳақиқий ўзгаришга тўсқинлик қилди. Абу-Дабида музокаралар давом этаётган пайтда ҳам Украинага тинч аҳоли ва фуқаролик инфратузилмасига қарши ҳужумлар тўлқинлари уюштирилмоқда”, — деб ёзади Rhenische Post газетаси ХДИ/ХСИ (Христиан-демократик ва Христиан-социал иттифоқлар) фракциясининг Бундестагдаги ташқи сиёсат бўйича эксперти Юрген Хардт сўзларини келтириб. Унинг фикрича, “Путин ҳали ҳам ҳақиқий тинчликни истамаяпти, у Украинанинг таслим бўлишини истаяпти”.

Хардтнинг бу фикрига ХДИ/ХСИ фракцияси раҳбари ўринбосари Норберт Рёттген ҳам қўшилди. У “Путин билан музокара қилиб бирор нарсага эришиш мумкин” деган ғояни “иллюзия” деб атади. “Путин бу урушни истаяпти ва ўзини ғалаба сари кетаётгандек ҳисоблаяпти”, — дейди сиёсатчи. Рёттген, шунингдек, Россия президенти ҳозир эҳтимол “иқтисодий ва сиёсий жиҳатдан” урушни тўхтатишга қодир эмаслигини ҳам айтди.

“У иқтисодиётини бутунлай вайрон қилди. Унда икки хонали инфляция ва фоиз ставкалари бор. У Хитойга қарам, унинг нефт бизнеси ишламаяпти. У ҳозир фронтда турган бир миллион аскарни жамиятга қайтара оладими ўзи? Ишсиз ва руҳий-жисмоний жароҳат олган бу одамларни”, — деди у ARD телеканалида Карен Миосга олиб борадиган ток-шоу дастурида.

Бундестагдаги “яшиллар” фракцияси раиси ўринбосари Агнешка Бруггер ҳам музокаралар “ҳозирча ҳеч қандай тараққиёт бермагани”ни айтди. У Европани “Путинга нисбатан кўпроқ босим ўтказишга ва Украинага каттароқ ёрдам, шунингдек ишончли хавфсизлик кафолатларини тақдим этишга” чақирди.

Потсдам университети профессори, ҳарбий эксперт ва тарихчи Зёнке Найтцел эса Путин Абу-Дабидаги музокаралардан Доналд Трамп билан “умумий келишув” тузиш учун унга ёндашув йўлини топиш мақсадида фойдаланаётганини айтди. “Лекин мен Путин урушни тугатиши керак, деб ҳисоблаётганига мутлақо ҳеч қандай аломат кўрмаяпман. Фақат Путин сулҳ (ўт очишни тўхтатиш) орқали урушни давом эттиришдан кўра кўпроқ ютуққа эришишини тушунгандагина, қандайдир сулҳ бўлиши мумкин”, — деди эксперт ARD эфирида.

Музокараларга нисбатан ижобийроқ муносабатни Бундестагдаги Сўл партия фракцияси ҳамраиси Зёрен Пелманн билдирди.

“Бу — кичик умид учқуни, гап конструктив музокаралар ҳақида кетяпти. Албатта, келишмовчиликлар ҳали ҳам жуда катта ва айрим жиҳатларда енгиб бўлмайдигандек туюляпти. Аммо музокаралар олиб бориляпти”, — деди сиёсатчи.

Бу фикрни сиёсатшунос Даниэла Шварцер ҳам қисман қўллаб-қувватлади: “Бир қарашда, бу музокаралардан деярли ҳеч нарса чиқмагандек туюлади. Лекин яхши томони — бир ҳафтадан кейин яна бир учрашув бўлиши керак. Бу бироз умид беради. Аммо мен Путиннинг тайёрлигига жуда шубҳа билан қарайман”, — деди у ARD эфирида.