Хитойда нуфузли генералларга қарши тергов бошланди

Хитойда Марказий ҳарбий кенгаш раиси ўринбосари Чжан Юся ва армия қўмондони Лю Чжэнли коррупцияда гумонланмоқда.

Чжан Юся Фото: Ng Han Guan/AP

Хитойнинг Халқ-озодлик армияси (ХХОА)да кенг кўламли коррупция можароси авж олди. Унинг марказида Марказий ҳарбий кенгаш (МҲК) раиси ўринбосари Чжан Юся ва МҲК қўшма штаби бошлиғи генерал Лю Чжэнли турибди. Агар Чжан лавозимидан четлатилса, бу 1989 йилда Тянанмэн майдонидаги намойишлар бостирилганидан кейинги даврдан бери Хитой армиясидаги энг йирик кадрлар алмашинувларидан бири бўлади, деб ёзади The Washington Post якшанба, 25 январ куни.

Бундан ташқари, Хитойдаги энг юқори лавозимли ҳарбий амалдор ҳисобланган Чжаннинг вазифадан четлатилиши ХХР раиси Си Жинпинг қўлида ҳарбий ҳокимиятнинг мисли кўрилмаган даражада жамланишини англатади, дея қайд этади нашр.

Financial Times газетаси ҳам армиядаги коррупцияга қарши терговлар натижасида қуролли кучларга раҳбарлик қилувчи Марказий ҳарбий кенгашда атиги икки киши қолганини, улардан бири Хитой раҳбари эканини таъкидлайди. Журналистлар бу ҳолат МҲК учун мисли кўрилмаган вазият эканини кўрсатади.

Бундан бир кун олдин Пекиндаги Миллий мудофаа вазирлиги Чжан Юся ва Лю Чжэнлига нисбатан “интизом ва қонуннинг жиддий бузилиши” бўйича тергов бошланганини маълум қилди. AFP қайд этишича, Хитойда бу атама кўпинча коррупцияни англатиш учун ишлатилади.

75 ёшли Чжан Юся — мамлакатдаги энг юқори лавозимли генерал ва ҳукмрон Хитой Коммунистик партияси сиёсий бюросининг 24 аъзосидан бири. У МҲК раиси ўринбосари лавозимини ўз қўли остидаги ҳарбий — Хитой ракета қўшинлари генерали ва фамилияси бир хил бўлган Чжан Шэнмин билан биргаликда эгаллаб туради.

2012 йилдан бери МҲКни бошқариб келаётган Си Жинпинг коррупцияни Хитой учун “энг катта таҳдид” деб атайди. 2013 йилда ХХР раиси лавозимига киришганидан сўнг, Си ҳарбий ва давлат бошқарувининг барча даражалардаги эҳтимолий коррупциясига қарши курашни кучайтирган. Танқидчилар эса у коррупцияга қарши кампанияни кераксиз рақибларни бартараф этиш учун ишлатяпти, деб ҳисоблайди.

Октябр ойида Хитой ҳукумати армиянинг тўққиз нафар вакилига нисбатан коррупция гумони билан терговлар бошланганини эълон қилган. Икки нафар юқори мартабали генерал лавозимидан олинган, улар орасида Чжан Шэнминнинг ўтмишдоши бўлган Хэ Вэйдун ҳам бор.