Дерипаска Telegram'дан урушга оид постларни ўчириб ташлади

Олег Дерипасканинг Telegram-каналидан Украинадаги уруш ва Россия ҳокимиятини танқид қилган постлар йўқолди. Хусусан, уруш “телбалик” деб аталган пост ҳам ўчирилгани ҳақида “Важные истории” хабар берди.

Фото: Владислав Шатило / РБК

Россиядаги энг йирик металлургия холдинги “Русал”нинг собиқ раҳбари Олег Дерипаска Telegram ижтимоий тармоғида Украинадаги уруш ва Россия ҳокимиятини танқид қилган постларини ўчириб ташлади. “Важные истории” нашри 26 январ, душанба куни хабар беришича, унинг каналида 2025 йил 1 ноябргача эълон қилинган урушга қарши баёнотлар йўқолган.

Жумладан, Дерипаска Украинага кенг кўламли ҳужумни “телбалик” деб атаб, уни “ҳозирнинг ўзида тугатиш керак” деган пост ҳам ўчирилган. Шунингдек, у қўшимча экспорт божларини “пул сиқиб олиш/экспроприация” деб баҳолаган нашрини ҳам олиб ташлаган. Бундан ташқари, у солиқларни оширмаслик учун Мудофаа вазирлиги ва бошқа куч тузилмалари штатларини чоракка қисқартиришга чақирган постни ҳам ўчирган — унда “бу тўдани боқиш” учун солиқни кўтаришга қарши фикр билдирилган.

Нашр қайд этишича, Дерипаска кейинроқ ёзган баъзи постларини таҳрирлаган ҳам. Хусусан, 12 январ кунги постда у ҳокимият ҳаракатлари сабаб “минглаб” Россия корхоналари банкрот бўлиш хавфи остида қолишини айтган. “Қандайдир меъёрдан ташқари даражада содда эксперимент кетяпти, у шармандали тарзда якунланади”, — деб ёзган у. Кейинроқ ушбу постда фақат инфляцияга қарши курашда ҳокимият ва бизнес ҳаракатларини мувофиқлаштиришга чақириқ қолган.

Президент Владимир Путинга яқин шахс ҳисобланадиган олигарх Олег Дерипаскага АҚШ 2018 йилдан бери санкция қўйган. РФнинг Украинага кенг кўламли ҳужуми бошланганидан кейин эса у ЕИ, Буюк Британия ва бошқа давлатларнинг санкция рўйхатларига киритилган.

Дерипаска шахсий санкцияларни бекор қилдиришга уриниб, бир неча бор резонанс баёнотлар берган, аммо Путинни бирор марта тилга олмаган. Британиянинг Financial Times газетаси маълумотига кўра, Кремл камида икки марта ундан урушни танқид қилишни тўхтатишни талаб қилган.

Украина Хавфсизлик хизмати (УХХ) Дерипаскага Украина Жиноят кодексининг бир нечта моддалари бўйича, жумладан урушни молиялаштириш учун ҳам, сиртдан гумон эълон қилган. Украинада унинг барча заводлари миллийлаштирилган ва 48 млн евро миқдоридаги активлари хатловга олинган.