Инспекция: қурилиш, уй-жой ва сув тармоқларида қатор қонунбузилишлар аниқланди

Қурилиш ва уй-жой коммунал хўжалиги соҳасида назорат қилиш инспекциясининг 2025 йилдаги фаолиятига доир маълумотлар Инспекция томонидан ўтказилган брифингда эълон қилинди.

Маълум қилинишича, 2025 йил давомида республика бўйича 26 804 та қурилиш объектида олиб борилаётган қурилиш-монтаж ишлари давлат назоратига олинган. Ушбу объектларда ҳудудий инспекциялар томонидан 370 676 маротаба назорат ва мониторинг тадбирлари ташкил этилган.

Шунингдек, 24 671 та кўп квартирали уй-жойнинг техник ҳолати ўрганилиб, 7 мингга яқин қонунбузилиш ҳолати аниқланган. Қайд этилишича, камчиликларни бартараф этиш бўйича тегишли чоралар кўрилиб, маъмурий жарималар қўлланган ҳамда судларга даъво аризалари киритилган.

Бундан ташқари, ичимлик ва оқова сув тармоқларига 5 745 та ноқонуний уланиш ҳолати аниқланиб, уларнинг барчаси бўйича қонунчиликка мувофиқ чоралар кўрилган.