Ипотекага олинган уйга бошқа шахсларни рўйхатга қўйишда банкнинг рухсати талаб этилмайди

Ўзбекистонда ипотека ҳисобига сотиб олинган уйга бошқа шахсларни банкнинг розилигисиз рўйхатга қўйиш мумкин бўлди. Бундай тартиб 15 июл имзоланган президент қарорида кўрсатилган.

Қарорга кўра, тақиқ ёки хатлов қўйилган турар жойга гаровга олувчининг розилигисиз яшаш ва турган жойи бўйича рўйхатдан ўтказишга рухсат берилади. Бунда рўйхатдан ўтказилаётган шахс мулкдорнинг (гаровга олувчининг, тақиқни қўйишга ёки ечишга масъул органнинг) ички ишлар органларига қилган мурожаати асосида унинг рўйхатдан ўтказилганлиги бекор қилинишига аввалдан розилик бериши зарур.

Шунингдек, қарорга асосан, 2027 йил 1 январдан бошлаб қуйидагилар жорий этилиши ҳам белгиланган:

• кўчмас мулкка бўлган ҳуқуқларни давлат рўйхатидан ўтказиш пайтида ҳуқуқ эгаси ўз вақтида рўйхатдан ўтказувчи органга мурожаат этмаганлиги аниқланганда маъмурий жавобгарлик қўлланилмайди ва кечиктириш муддатидан келиб чиқиб рўйхатдан ўтказиш учун оширилган ставкаларда тўлов ундирилади;

• солиқ тўловчига хусусий мулк ҳуқуқи асосида тегишли бўлган турар жой мерос тартибида ёки яқин қариндошидан ҳадя сифатида олинган бўлса, ушбу турар жойни сотишдан олинган даромадга солиқ солинмаслиги учун белгиланган муддат васият қилувчи ёки ҳадя қилувчининг мазкур турар жойга бўлган мулк ҳуқуқи давлат рўйхатидан ўтказилган санадан бошлаб ҳисобланади.