Рафаҳ ўтказиш пункти қайта очилди: илк сафар қилувчилар ўтди

Рафаҳ пункти — Миср билан Ғазо сектори ўртасидаги назорат-ўтказиш пункти 2 феврал куни илк сафар қилувчиларни қабул қилди. Бу ҳақда Agence France-Presse (AFP) исроиллик манбага таяниб хабар берди. Пункт EUBAM — Европа Иттифоқининг чегаравий ёрдам миссияси кузатуви остида иш бошлади.

Фото: picture alliance

Мисрнинг Al-Kahera News телеканали маълумотига кўра, пункт очилганидан кейинги дастлабки соатларда 50 киши Мисрга кирган, яна 50 киши у ердан чиққан. Исроилнинг жамоатчилик телеканали KAN ҳам 2 феврал куни 50 киши Ғазога кириши режалаштирилганини билдирган. Шу билан бирга, 150 киши, жумладан 50 нафар бемор, Миср томонга чиқиши кутилган. Пункт ҳар куни олти соат очиқ бўлиши айтилган.

AFP мухбирлари маълум қилишича, 2 феврал куни Миср томонида ўнлаб одамлар Ғазога кириш имкониятини кутиб тўпланган.

Қарийб икки йил ёпиқ бўлган Рафаҳ пункти 1 феврал куни чекланган ҳажмда ишни тиклади. Исроилнинг фуқаролик масалалари бўйича идораси Cogat бу қадам Исроил билан ҲАМАС ўртасидаги сулҳ келишувининг бир қисми эканини тушунтирган.

Дастлаб Мисрга чиқиш ҳуқуқи тиббий ёрдамга муҳтож бўлганларга берилиши кутилмоқда. Ғазо соғлиқни сақлаш идораси маълумотига кўра, ҳозир 200 га яқин бемор рухсат кутиб турибди. Al-Kahera News хабарига кўра, Мисрда фаластинликларни қабул қилиш учун 150 та шифохона, 12 минг тиббиёт ходими ва 300 та тез ёрдам машинаси тайёр ҳолга келтирилган.

Рафаҳ пункти — Ғазодан Исроилга олиб бормайдиган ягона чегара ўтиш жойи. БМТ ва халқаро гуманитар ташкилотлар уни анча вақтдан бери кенг кўламда гуманитар ёрдам етказиш учун очишга чақириб келган.

Пунктнинг очилиши АҚШнинг тинчлик режасига мувофиқ амалга оширилди. Исроил бу қадамни ҲАМАС томонидан асирга олинган сўнгги гаровга олинган шахс — 24 ёшли Ран Гвили жасадини қайтариш билан боғлади.

2023 йил 7 октябрда ҲАМАС Исроилга кенг кўламли ҳужум уюштирганидан кейин Яқин Шарқда вазият кескинлашди. Ҳужумда тахминан 1200 киши ҳалок бўлган, 250 га яқин одам гаровга олиниб Ғазога олиб кетилган.

Исроил бунга жавобан ҳарбий амалиёт бошлади. Ғазо соғлиқни сақлаш идораси маълумотига кўра, 71 мингдан ортиқ киши ҳалок бўлган. ЦАҲАЛ эса қурбонлар сони тахминан 70 минг эканини тасдиқлаб, улардан 25 мингга яқини ҲАМАС жангчилари бўлганини билдирган.

2025 йил октябрда АҚШ президенти Доналд Трамп маъмурияти ишлаб чиққан тинчлик режаси асосида ўт очишни тўхтатишга келишилган. Келишув кафиллари сифатида АҚШ, Туркия, Қатар ва Миср иштирок этмоқда.

Режанинг иккинчи босқичида “Тинчлик кенгаши” ва унинг назоратидаги миллий қўмита тузилиб, Ғазо бошқарувини вақтинча ўз зиммасига олиши, кейинчалик эса бу вазифани Фаластин миллий маъмуриятига топшириши кўзда тутилган.