Илон Маскнинг бойлиги 800 миллиард доллардан ошди – Forbes

Бу унинг SpaceX компанияси сунъий интеллектга ихтисослашган ва Грок чатботини ишлаб чиққан xAI компаниясини сотиб олганидан кейин содир бўлди.

Фото: Getty images

Америкалик бизнесмен Илон Маск бойлиги 800 миллиард доллардан ошган дунёдаги биринчи одам бўлди, деб ёзди Forbes.

Бу унинг SpaceX компанияси сунъий интеллектга ихтисослашган ва Грок чатботини ишлаб чиққан xAI компаниясини сотиб олганидан кейин содир бўлди. Forbes ҳисоб-китобларига кўра, келишув Маскнинг бойлигини 84 миллиард долларга - рекорд даражадаги 852 миллиард долларга етказди.

Forbes талқини бўйича энг бой одамлар рўйхатида иккинчи ўринни Google ҳаммуассиси Ларри Пейж эгаллади. Нашр унинг бойлигини 281 миллиард долларга баҳоламоқда.

Битимдан олдин Маск SpaceX’нинг 336 миллиард долларлик 42 фоиз акциясига, шунингдек, xAI’нинг 122 миллиард долларлик 49 фоиз акциясига эгалик қилган. Битимдан сўнг Маск, Forbes ҳисоб-китобларига кўра, бирлашган компаниянинг 542 миллиард долларлик 43 фоиз акциясига эгалик қилади.

«Бу SpaceX’ни Маскнинг энг қиммат активига айлантиради», деб хулоса қилди Forbes.

2025 йил 20 декабрда Forbes Маскнинг бойлиги 700 миллиард доллардан ошганини ёзган эди. Бундан беш кун олдин Forbes Маскнинг бойлигини 677 миллиардга баҳолаган ва уни бойлиги 600 миллиарддан ошган дунёдаги биринчи одам деб атаган эди.

Маск биринчи марта Forbes’нинг энг бой тадбиркорлар рейтингини 2021 йил январида бошқарган, шунда унинг бойлиги 190 миллиард долларга баҳоланган эди.