Трамп шатдаунни тўхтатиш учун қонун лойиҳалари пакетини имзолади

АҚШ президенти Доналд Трамп сешанба куни, 3 феврал кечқурун, аввалроқ АҚШ Конгрессининг Вакиллар палатаси томонидан қабул қилинган қонун лойиҳалари пакетини имзолади ва шу билан ўзининг иккинчи президентлик муддатидаги иккинчи шатдаунга барҳам берди. Шу тариқа, АҚШ федерал ҳукуматининг навбатдаги қисман ишдан тўхташи тўрт кун давом этди.

Ҳужжатлар Трамп томонидан имзоланишидан бир неча соат олдин Вакиллар палатаси кўпчилик овоз билан АҚШ Сенати томонидан аввалроқ қабул қилинган муросали бюджетни маъқуллади. Бюджет лойиҳасини 217 нафар депутат қўллаб-қувватлади, 214 нафари қарши овоз берди. Бюджет учун Демократик партиядан ҳам 20 нафар сиёсатчи овоз берган, бироқ шунча — 20 нафар республикачилар унга қарши чиққан.

Конгресс Сенати 31 январ куни мамлакат ҳукумати ишини молиялаштириш бўйича қонун лойиҳалари пакетини молиявий йил охиригача тасдиқлаган эди. Пакетни қўллаб-қувватлаб юқори палатанинг 71 аъзоси овоз берган, 29 аъзоси қарши чиққан. Шунга қарамай, шатдауннинг олдини олиб бўлмади, чунки Вакиллар палатаси ҳужжат матнини фақат 3 феврал кунигина кўриб чиқишга улгурди.

30 январга ўтар кечаси Оқ уй ва демократлар АҚШ Иммиграция ва божхона назорати хизмати — ICE фаолиятига қўйиладиган талабларни кучайтириш масаласидаги баҳсда муросага келди. Доналд Трамп демократлар билан келишувга эришилганини, унга кўра бюджет пакетининг олти қисмидан бештасини қабул қилиш мумкинлигини айтган.

ICE ходимлари бир неча ой давомида демократлар бошқараётган қатор Америка шаҳарларида депортация бўйича рейдлар ўтказиб келмоқда. Миннеаполисда қаттиққўл ҳаракатларга қарши намойишлар вақтида АҚШнинг икки нафар фуқароси ҳалок бўлган.

1977 йилдан бери АҚШ ҳукумати молиялаштиришда давомийлиги уч кун ва ундан кам бўлган 10 тадан ортиқ танаффусларни бошдан кечирган. Пауза­ларнинг аксарияти реал оқибатларга олиб келмаганини АҚШ Конгрессининг Тадқиқот хизмати қайд этган. Масалан, 2025 йил 13 ноябрда Трамп федерал ҳукумат фаолиятини молиялаштиришни 30 январгача (шу кунни ҳам қўшган ҳолда) узайтириш тўғрисидаги қонунни имзолаган эди.

Ўшанда шатдаун 43 кун давом этиб, мамлакат тарихидаги энг узоқ бундай танаффус бўлган. Федерал бюджет юзасидан республикачилар ва демократлар ўртасидаги келишмовчиликлар сабаб тахминан 750 минг федерал хизматчи маош сақланмаган ҳолда мажбурий таътилга чиқарилган. Фақат ҳаётий муҳим тузилмалар — авиадиспетчерлик хизмати, полиция, чегара қўриқлаш ва шошилинч тиббий ёрдам ходимлари ишни давом эттирган.