Эрон корпуси Форс кўрфазида икки танкерни ушлади

ИИМК Форс кўрфазида ушлаган икки танкердан 15 нафар экипаж аъзоси Эрон ҳуқуқни муҳофаза қилувчи органларига топширилди. Теҳрон версиясига кўра, кемалар “бир миллион литрдан ортиқ контрабанда ёнилғи” ташиган.

Фото: AP

Эрон Қуролли кучларининг элита қисмлари ҳисобланган Ислом инқилоби муҳофизлари корпуси (ИИМК) ҳарбий-денгиз кучлари Форс кўрфазида чет эллик экипажлар бўлган икки нефт танкерини ушлади. Бу ҳақда пайшанба, 5 феврал куни Эроннинг Tasnim ахборот агентлиги хабар қилди.

Эрон томони версиясига кўра, кемалар “бир миллион литрдан ортиқ контрабанда ёнилғи” ташиган. Экипаж аъзоларининг фуқаролиги ва танкерлар қайси байроқ остида юргани ҳақидаги маълумот ҳозирча ошкор қилинмаган.

Жами 15 нафар экипаж аъзоси Эрон ҳуқуқни муҳофаза қилувчи органларига топширилган, улар суд олдида жавоб беради.

Эрон қуролли кучлари Теҳрон Форс кўрфази ва Ҳўрмуз бўғозида ноқонуний савдода иштирок этганликда айблайдиган танкерларни мунтазам равишда мусодара қилади. AFP агентлиги қайд этишича, гап дунёда нефт ва суюлтирилган табиий газ ташишнинг энг муҳим йўналишларидан бири ҳақида кетмоқда.

Эронда ёнилғи нархи дунёдаги энг пастлардан бўлгани учун, хомашёни бошқа мамлакатларга контрабанда қилиш айниқса даромадли ҳисобланади.

Бундан олдин, 3 феврал куни Reuters агентлиги ва The Wall Street Journal газетаси олти нафар қуролланган Эрон катери Ҳўрмуз бўғозида (Уммондан тахминан 30 км шимолда) АҚШ байроғи остида ҳаракатланаётган Stena Imperative танкерига яқинлашганини хабар қилган эди.

Эрон катерларидан танкер жамоасига двигателни тўхтатиш ва абордажга тайёрланиш буйруғи берилган, аммо Stena Imperative тезликни ошириб, ҳаракатни давом эттирган — кейинчалик АҚШ ҳарбий кемаси кузатуви остида бўлган.

Ҳўрмуз бўғози Форс кўрфазини Уммон кўрфази, Араб денгизи ва Ҳинд океани билан боғлайди. Ушбу денгиз йўли орқали жаҳон нефт қазиб олиш ҳажмининг тахминан бешдан бири ташилади. 2025 йил июнида ИИМК ҳарбий-денгиз кучлари қўмондонлиги вакили АҚШ томонидан ҳужум бўлган тақдирда Ҳўрмуз бўғозини беркитиб қўйиш билан таҳдид қилган эди.