Киевда 1100 дан ортиқ уй камида икки ой иссиқликсиз қолади

Украинанинг пойтахти Киевда 1100 дан ортиқ кўп қаватли турар жой уйлари Россиянинг Украина энергетика инфратузилмасига берган зарбалари сабаб камида икки ой иссиқликсиз қолади. Бундай прогнозни Киев мэри Виталий Кличко пайшанба, 5 феврал куни билдирди.

Кличко тушунтиришича, мазкур уйларнинг Дарница ва Днипро туманларидаги иссиқлик таъминотини Дарница иссиқлик электр маркази (ИЭМ) таъминлаб келган. У 3 феврал куни зарбага учраган. Мутахассислар ИЭМдаги шикастланишларни ўрганиб, уларни танқидий деб баҳолаган ва тизимлар ҳамда ускуналарни тиклаш учун, агар РФ томонидан яна янги кенг кўламли ҳужумлар бўлмаса, камида икки ой керак бўлади, дея хулоса қилган, деди мэр. Унинг айтишича, зарар кўрган кўп қаватли уйларнинг иситиш тизимларидан 3 феврал эрталаб сув тўкиб юборилган — тизим музлаб қолмаслиги учун.

Мэр қўшимча қилишича, шаҳар ҳокимияти иссиқликсиз қолган ҳудудлардаги мактабларда қўшимча таянч исиниш пунктларини очган. Бундан ташқари, Украина Фавқулодда вазиятлар бўйича давлат хизмати Дарница туманида 36 та, Днипро туманида эса 27 та қўшимча исиниш пунктини жойлаштирмоқда, деди у.

Россия анчадан бери қўшни мамлакатнинг энергетика инфратузилмасига оммавий зарбалар бериб келмоқда. АҚШ президенти Доналд Трамп 29 январ куни, ўзи шахсан мурожаат қилганидан кейин, РФ президенти Владимир Путин кучли совуқлар фонида яқин етти кун давомида Украина шаҳарларини ўққа тутишни тўхтатишга рози бўлганини айтган.

Украина президенти Володимир Зеленский энергетика инфратузилмасига зарбаларни вақтинча тўхтатиш бўйича келишув ҳақидаги маълумотни тасдиқлаган, аммо Москва билан тўғридан тўғри мулоқот бўлмаганини аниқлаштирган. Юз минглаб киевликлар электр ва иссиқликсиз қолмоқда, ҳарорат эса яқин вақтгача −20°C дан паст бўлиб турган.

2 февралга ўтар кечаси Россия қўшни мамлакатнинг энергетика инфратузилмасига зарбаларни яна қайта бошлади, ундан олдинги кунларда эса Украинага юзлаб учувчисиз аппаратлар ва бир неча “Искандер-М” ракеталари билан ҳужум қилган. Шу билан бирга, 3 феврал куни Трамп Кремл раҳбари гўёки энергетика бўйича вақтинчалик “сулҳ”га риоя қилганини айтди ва яна бир бор Москвани урушни тўхтатишга чақирди.