Япония бош вазирининг ҳукмрон блоки сайловда ғалаба қозонди

Япония бош вазири Санаэ Такаити бошчилигидаги либерал-демократик партия таркибидан ўрин олган ҳукмрон блок 8 феврал куни бўлиб ўтган сайлов натижаларига кўра парламент қуйи палатасидаги жойларнинг учдан икки қисмини қўлга киритди.

NHK телекомпаниясининг хабар беришича, ҳукмрон блок 310тадан ортиқ ўринни олган ҳолда конституцион кўпчиликни таъминлайди. Бу эса бош вазир Такаити ҳамда ЛДП анчадан буён илгари сураётган конституцияни ўзгартириш учун имкониятлар эшигини очади. Шунингдек, эндиликда ҳукмрон блок парламент юқори палатасининг қарорларини рад этган ҳолда ҳар қандай қонунни қабул қилиши мумкин бўлади.

Такаити январда парламент қуйи палатасини тарқатиб юборганди.

ЛДП бош қароргоҳига келган бош вазир Санаэ Такаити партиядошлари табригини қабул қилар экан, қувонч кўзёшларини зўрға тийиб тура олди.

У Япония халқига қўллаб-қувватлагани ва ишончи учун миннатдорлик билдирди.

Мамлакат парламенти қуйи палатаси ўтган йил октябрда Санаэ Такаитини бош вазир этиб тасдиқлаганди. У Япония миллий мудофаасини мустаҳкамлаш, «анъанавий япон қадриятлари»ни тиклаш ҳамда кескин миграцион сиёсатни жорий этишни мақсад қилган.