Маск фронтни «музлатди», «Орешник» омборига «Фламинго» билан зарба – ҳафта дайжести

Ассалому алайкум, азизлар. Бугун 8 феврал, якшанба. Ҳафта давомида бутун дунё Эпштейн файлларини муҳокама қилди. Етти йил аввал қамоқхонада ўлган педофил бунчалик машҳур бўлиб кетишини тасаввур ҳам қилмаган десак... менимча, хато бўлади. Чунки бунақа катта одамларни ўзи фоҳишабозлик қилган оролига таклиф қилиб, уларни расмга, видеога олган одам қачондир бутун дунё у ҳақда гапиришини билган.

Ташқаридан қараганда, худди қайсидир давлат разведкаси Эпштейн деган аёлларга суяги йўқ одамни миллионер қилиб, уни Америка элитаси ичига киритиб, энди ҳамманинг устидан компромат тўпла, деганга ўхшайди. Ахир бу тавқи лаънатга учраган файллардан кимларнинг исми чиқмаяпти дейсиз.

Демак бугунги роликда бутун дунё муҳокамасидаги Эпштейн файллари ва бошқа муҳим мавзулар ҳақида гаплашамиз. Ҳафта давомида Роналду Саудия футболига бойкот қилди, Россия уруш музокараларини яна чўзишни бошлади, Украина ўзи ясаган қанотли ракета билан «Орешник» учирилган полигонга зарба берди.

Шунингдек, Пригожин шарманда қилган россиялик генерални ўлдирмоқчи бўлишди, Starlink'ни ўчирган Илон Маск россиялик Z-блогерлар ғазабига учради. Ва яна бошқа қизиқ воқеалар содир бўлди. Қуйида ҳафтанинг шу ва бошқа муҳим воқеаларини ёдга оламиз.

Трампнинг расистик пости

АҚШ президенти Трамп жума куни ўзига тегишли Truth ижтимоий тармоғидаги саҳифасида ғалати видео эълон қилди. Унда гўёки 2020 йилги президентлик сайловларида овозлар сохталаштирилгани ҳақида гап борган. Ролик охирида АҚШ собиқ президенти Барак Обама ва хотини Мишел Обама қўшиқ куйлаётган маймун кўринишида тасвирланган.

Видео тезда вирус каби тарқалди. Ҳеч ким унинг моҳиятига қизиқмади, Трамп собиқ президент Обама маймун кўринишидаги тасвирланган видеони жойлаганини муҳокама қила бошлади. Машҳур демократлар Оқ уйдан изоҳ талаб қилди. Трампнинг саҳифасида 12 соат турган пост ўчирилди.

Хуллас, дунё мистер Трампнинг даврида ҳамма нарсани кўрмоқда: қўшни давлат президенти олиб қочилишини, Эронга зарба берилишини, миграцион полиция америкаликларни отиб ташлашини, Европа Иттифоқига таҳдид қилинишини ва мана, энди Америка тарихидаги ягона қора танли президент Барак Обама бутун бошли президентининг саҳифасида маймун кўринишида тасвирланишини. Худди Трамп «Қараб туринглар, мен хоҳлаганимни қиламан, барибир импичмент бўлмайди», деб ким биландир гаров ўйнагандек.

Роналду хафа

Ҳафта давомида миллиардлаб доллар пул сарфланаётган Саудия футболида можаро авж олди. Ҳукумат даражасидаги стратегик дастур деб қаралаётган футбол мегалойиҳаси марказида турган португалиялик футболчи Криштиану Роналду Саудия суверен фонди унинг жамоаси «Ан Наср»га эмас, пойтахтнинг бошқа жамоаси «Ал Ҳилол»га кўпроқ эътибор бераётганидан хафа экан.

Футболчи «Наср»нинг охирги икки ўйинида майдонга тушмади ва шу тариқа бошқарувдан норози эканини кўрсатди. Карим Бензема ҳам «Ал Ҳилол»га ўтгани Роналдунинг норозилигини кучайтирган.

«Россия музокарани чўзмоқда»

Ҳафта давомида Абу Дабида Россия, Украина ва АҚШ ўртасида навбатдаги уч томонлама музокара ўтказилди. Кутилганидек, бу музокаралар жиддий кайфиятда ўтаётгани йўқ, унда фақат асирлар алмашинуви борасида келишувга эришилди холос, доимгидек.

Сиёсатдан йироқ бўлган одам ҳам тушуниб турибдики, бу мантиқсиз музокаралар фақат бир мақсадда, урушни чўзиш учун ўтказилмоқда. Россия музокараларни чўзаётганини тушуниш учун сиёсий фанлар доктори бўлиш шарт эмас. Россия бу гал ҳам ўзининг доимий усулини қўлламоқда. Яъни биз сулҳга розимиз, лекин... ана шу лекиндан кейин доимгидек бажариб бўлмас талаблар бошланади.

Украина музокарачилари вакили, мамлакат парламенти спикери Руслан Стефанчук ҳам шу мазмунда гапирди. «Россия музокараларни чўзмоқда. Улар доим шунақа қилади. Биз ҳеч қандай шартларсиз ҳар қандай нарсага тайёрмиз, лекин, лекин, лекин, дейишади. Америкаликларга ҳам айтдик, бизда Будапешт меморандуми кўринишида жуда ёмон тажриба бор, шу боис мажбурий хавфсизлик кафолати истаймиз», деди Украина вакили.

Ҳозир Россия ва Украина ўртасидаги уруш чинакам стратегик боши берк кўчага кириб қолган. Россия ҳатто парча Покровскни ололмаяпти, уч марталаб эгаллангани айтилган Купянскни бой берди. Донбассни ҳеч қанақасига куч билан ололмаётган руслар бу ҳудуд устидан назоратни музокаралар вақтида урушсиз қўлга киритмоқчи. Улар музокараларда Трампга Донбасс аллақачон эгаллаб бўлингани, ҳудуд тўлиқ Россия назоратига ўтиши, фақат вақт масаласи эканини уқтириб келишади. Лекин бу гапларни бир йилдан бери эшитаётган Трамп ҳам афтидан энди Москванинг гапларини жиддий қабул қилмаяпти.

Эпштейн ҳамон муҳокамада

Дунё ҳамон америкалик педофил Жеффри Эпштейн файлларини муҳокама қилмоқда. Эълон қилган файллардан нималар чиқмади дейсиз: КГБ ҳақида версиялар, хусусан, Путиннинг номи файлларда минг мартадан ортиқ тилга олинган, ўзбекистонлик қиз тишини даволатиш учун педофилдан пул олгани, Норвегия қироллик оиласи вакили, Исроил собиқ бош вазирининг педофил билан алоқалари. Хуллас, йўқ нарсанинг ўзи йўқ.

Янги партиядаги ҳужжатларда фаҳш масаласидаги фитна назариялари бир чеккага сурилиб, сиёсий масалалар биринчи планга чиқди. Айниқса Эпштейннинг Исроил ва Россия билан алоқалари кўп муҳокама қилинмоқда. Кучли разведка тизимига эга бу икки давлат америкалик педофил билан қандай алоқа қилиши мумкинлиги чиндан қизиқарли. Чунки ҳужжатларда унинг Моссад билан алоқаси бўлиши мумкинлиги ҳақида гап боради.

Эпштейннинг Исроил собиқ бош вазири Эҳуд Барак билан ёзишмалари ҳам эълон қилинган. Улардан бирида педофил Исроил етакчисига «Сен мен Моссадга ишламаслигимни аниқ қилиб айтишинг керак», деб ёзган ва гапини смайлик билан якунлаган. Бу нимани англатишини тушуниш қийин эмас.

Чиндан молиячининг Кариб ҳавзасида бутун бошли орол сотиб олгани, у ерга минглаб ёш қизларни олиб бориб жинсий алоқа қилгани, оролга Американинг энг катта, энг машҳур одамлари бориб базмларда қатнашгани ва энг қизиғи ҳамма ўша оролдаги виллада расмга олингани Эпштейн ким учундир компромат тўплаган деган тасаввур уйғотади.

Хуллас, бу аср жумбоғи ҳали-бери ечилмаса керак. Можарога қанақа катта одамлар аралашгани ҳисобга олинса, ўша лаънатланган оролда нималар бўлганини инсоният билолмаса ҳам керак. Педофилнинг ўзи эса сирларини аллақачон гўрга олиб кетиб бўлган.

Россиялик генералга суиқасд

Москвада яна бир россиялик генералга суиқасд қилинди. Номаълум шахс генерал-лейтенант Владимир Алексеевга бир неча марта ўқ узиб, яширинган. Генерал тирик қолгани, оғир аҳволда касалхонага ётқизилгани айтилмоқда. Алексеев оддий генерал эмас, жуда катта одам. У Бош штаб бош разведка бошқармаси бошлиғи адмирал Костюковнинг биринчи ўринбосари. Яхшироқ тушунишингиз учун, Алексеев ўша машҳур ГРУдаги иккинчи одам. ГРУ бу Россиянинг Моссади.

Бу генерал 2023 йил июнида машҳур бўлганди. Ўшанда Ростовдаги Россия армияси штабига бостириб борган «Вагнер» асосчиси Евгений Пригожин айнан Алексеев ва генерал Юнус-Бек Евкуровдан штаб бошлиғи Герасимов ҳамда мудофаа вазири Шойгуни олиш учун келганини айтиб, икки генерални очиқчасига камситганди. Ҳолат видеоси интернетда машҳур бўлган. Видеода Алексеев Герасимов ва Шойгуни сўраган Пригожинга «Олаверинглар», деб жавоб берганди. Худди машҳур бир рус киносида сохта шоҳ Кемска волостни сўраган швед элчисига «олаверинглар», дегани каби.

«Орешник» омборига «Фламинго» билан зарба

Ҳафта давомида Украина Россиянинг Астрахан областида жойлашган Капустин Яр полигонига зарба йўллади. Украина қуролли кучлари хабарига кўра, полигонда жойлашган ангар типидаги бинолар мажмуасига муваффақиятли зарбалар берилган. Бу полигондан Россия Украина шаҳарларига «Орешник» баллистик ракеталарини учирган.

Бу хабарни бекорга келтирмадим, ундаги энг аҳамиятли жиҳатига эътибор беринг: Астрахан Россиянинг Украинага чегара қисми эмас, украинлар Капустин Ярга зарбани фронт чизиғидаги Краматорскдан туриб берган бўлса ҳам, ракета камида 415 км масофа босиб ўтиши керак бўлган. Бунақа олис масофага Украина шу вақтгача ёки Американинг АТАCMS ёки Британиянинг Storm Shaddow ракеталари билан зарба бергани маълум. Лекин бу гал зарба учун Украинанинг ўзида ишлаб чиқарилган «Фламинго» номли қанотли ракетасидан фойдаланишган.

Демак, урушга СССР давридаги эски техникалар билан кириб борган Украина қўшнисига қарши урушнинг бешинчи йилига келиб 400 км узоқдаги нишонни урадиган шахсий ракетасига эга бўлди. Уруш ана шунақа нарса – одам тирик қолиш керак бўлса, ихтирочи бўлади, тинч давлатлар тўйни видеога олиш учун ишлатадиган дрон билан самолётни уради, молотов коктейли билан танкни ёқади...

Starlink можароси

Ҳафта давомида фронтда жиддий ўзгариш юз берди. Эсингизда бўлса, Зеленский яқинда Михайло Фёдоров деган биз тенги йигитни Украина мудофаа вазири этиб тайинлаганди. Кўпчилик IT секторидан чиққан бу бола ҳарбий соҳада нима қилиб юрибди, деб ҳам ўйлади, лекин айнан мана шу дастурчи йигит дронларни Украина армиясининг энг зўр қуролига айлантира олди.

Ёш вазир ишга киришиши билан Россия армиясига муаммо туғдира бошлади. У руслар Starlink терминалларидан Украинага ҳужум қилиш учун фойдаланаётганини Илон Маскка исботлаб берди. Starlink Россияда расман ишламайди, лекин руслар терминалларни учинчи давлатлар орқали сотиб олиб, дрон учириш ва мулоқот учун фойдаланиб келади.

Илон Маск балки бундан хабари бўлмагандир, миллиардер Украина мудофаа вазирининг сўровидан кейин фронтда Starlink фаолиятини чеклади. Оқибатда руслар коммуникация ва дронлар билан боғлиқ жиддий муаммога дуч келди. Z-блогерлар ёппасига Маскни қарғаб пост ёзди.

Шу ерда савол пайдо бўлади: Украина-ку тушунарли, бой давлат эмас, уруш бошида армияси ҳам кучсиз эди, қўшнисидан ҳар қанақа восита билан ҳимояланмоқда, лекин «дунёнинг иккинчи армияси», яъни Россия армияси наҳотки Америка компанияси яратган интернетга шунчалик боғланиб қолган бўлса? Наҳотки уларда дронларни учириш ва мулоқот учун сунъий йўлдошли интернетига муқобил алоқа воситаси бўлмаса? Америкаликлар техникасига таяниб қолиш қанчалик патриотизмга хос, жаноблар? Демак Россия армиясининг юришини Америкада биргина тугмани босиб тўхтатиш мумкин экан-да?

Бу ҳолатдан икки хулосага келиш мумкин: биринчидан, ҳеч қачон бир давлат ҳарбийлари алоқа масаласида бошқа давлат техникасига ишониб қолиши керак эмас; иккинчидан, давлат амалдорлари ёш, замонавий технологиялардан бохабар инсонлар бўлса, ўз ишини яхши бажаради. Омон бўлинг, азизлар. Кейинги якшанбагача.