АҚШ Россиянинг “яширин флоти”га алоқадор танкерни қўлга олди

Американинг қуролли кучлари 9 феврал, душанбага ўтар кечаси Aquila II нефт танкерини тўхтатиб, қўлга олди. Ғарб ва украин манбалари хабарларига кўра, у халқаро санкцияларни айланиб ўтиш учун қўлланадиган РФнинг “яширин флоти”нинг бир қисми ҳисобланади. Бу ҳақда АҚШ Мудофаа вазирлиги X ижтимоий тармоғида маълум қилди. Доналд Трамп маъмурияти даврида мазкур идора “Уруш вазирлиги” деб аталган.

Хабарда айтилишича, 2026 йил 9 феврал куни Aquila II танкери президент Трамп ўрнатган санкция режимига зид равишда ҳаракат қилган. АҚШ “Уруш вазирлиги” кеманинг қочишга уринганини, аммо у кузатув остига олиниб, аниқланганини билдирган.

Идора X тармоғидаги баёнотида шундай дейилади: “Уруш вазирлиги бу кемани Кариб денгизидан Ҳинд океанигача кузатди ва таъқиб қилди. Ер сайёрасида ҳеч бир бошқа давлат ҳар қандай шароитда ўз айтганини ўтказиш қобилиятига эга эмас. Қуруқликда, ҳавода ёки денгизда — Қуролли кучларимиз сизни топади ва адолатни тиклайди. Сиз биздан қочишга улгурмасингиздан олдин, ёнилғингиз тугайди. Уруш вазирлиги ноқонуний акторлар ва уларнинг воситачиларини глобал денгиз ҳудудларида Америка қудратига қарши чиқиш имкониятидан маҳрум қилади”.

Украина Бош разведка бошқармаси юритадиган War & Sanctions порталига кўра, Aquila II (IMO 9281152) санкцияларни айланиб ўтиб нефт ташишда иштирок этгани сабабли АҚШ, Буюк Британия, Европа Иттифоқи, Канада, Швейцария ва Украина санкция рўйхатларига киритилган.

Кема АҚШ 2025 йил январда Россия энергетика секторидаги фаолияти учун санкция жорий этган Sunne Co Limited компанияси билан боғлиқ. Айтилишича, танкер ҳам Россия, ҳам Венесуэла нефтини ташийди, баъзан транспондерни ўчириш ва жойлашувини яширишнинг бошқа усулларидан фойдаланади — бу “яширин флоти” кемаларига хос ҳолат.

Кема Россия ва Венесуэла портларидан юк ташийди, жумладан Хитой ва бошқа минтақаларга ҳам. У санкцияларни четлаб ўтиш схемаларининг фаол элементи деб ҳисобланади. Бироқ очиқ маълумотлар базаларида унинг рўйхатдан ўтиши ва қайси байроқ остида юриши масаласи баҳсли бўлиб қолмоқда.

2025 йил декабридан бери бу — Венесулага қарши жорий этилган “карантин”ни бузишга йўл қўймаслик мақсадида ушланган еттинчи кема.

Бундан аввал, 15 январ куни АҚШ текширувдан қочишга уринган Veronica танкерини тўхтатган — у номи ўзгартириб, Россия байроғини кўтаргани айтилган. Reuters агентлиги қайд этганидек, ушланган кемаларнинг барчаси ё санкция чекловларига тушган, ёки Россия, Эрон ё Венесуэла нефтининг келиб чиқишини яширишга мўлжалланган “яширин флоти”га мансуб деб қаралади.

The Telegraph маълумотларига кўра, Вашингтоннинг “яширин танкерлар”ни фаол тарзда ушлаш қарори Доналд Трампнинг Украинадаги уруш давом этаётгани сабаб Владимир Путиндан тобора кўпроқ норози бўлаётгани билан боғлиқ.