Зеленский сайловлар ҳақидаги хабарларни инкор қилди

Украина президенти Володимир Зеленский 11 феврал, чоршанба куни кечқурун Financial Times нашри тарқатган — гўё у 24 феврал куни, Россиянинг Украинага қарши тўлиқ кўламли уруши бошланганига тўрт йил тўлган санада, президент сайловлари санаси ҳамда тинчлик таклифлари бўйича референдум ҳақида эълон қилишни режалаштираётгани ҳақидаги маълумотни рад этди.

DW мухбирини ҳам ўз ичига олган журналистлар билан онлайн мулоқотда давлат раҳбари сайловлар масаласи фақат тегишли хавфсизлик кафолатлари мавжуд бўлгандагина муҳокама қилиниши мумкинлигини таъкидлади. “Мен доим айтганман: сайловлар масаласини у ёки бу ҳамкорлар кўтаради. Украина ўзи ҳеч қачон буни кўтармаган. Аммо, албатта, биз сайловларга тайёрмиз. Мен айтганман: жуда оддий — оташкесим қилинг, сайловлар бўлади. Бу — хавфсизлик масаласи”, — деди президент ва “аввало хавфсизлик, кейин сиёсат” эканини қўшимча қилди.

Зеленский 24 феврал санасининг Украина учун алоҳида аҳамиятга эга эканини таъкидлаб, айнан шу куни сиёсат ҳақида гапириш “аҳмоқона ғоя” бўлишини айтди — ҳатто “қандайдир мақсадлар ёки муайян сайловларни яқинлаштиришга қаратилган қадамлар” бўлган тақдирда ҳам.

“Бу жуда жиддий сана. Тўрт йиллик уруш. Давлатимизни ҳимоя қилган, жонини фидо қилган одамлар жуда кўп. Ва айнан 24 февралдан бошлаб ҳар куни давлатини ҳимоя қилиб келаётганлар бор. Мен сиз сўраган нарсани ҳеч қачон қила олмасдим. Шунинг учун 24 феврал куни ҳеч қандай сайловлар эълон қилиниши мумкин эмас”, — деди у.

Шу билан бирга, Украина президенти АҚШ гўё Украинада сайловлар бўлмаса, таклиф этилган хавфсизлик кафолатларидан воз кечиш билан таҳдид қилаётгани ҳақидаги маълумотни ҳам рад этди. У Вашингтон бу икки масалани боғламаётганини қайд этди. “Йўқ. Улар хавфсизлик кафолатларидан воз кечиш билан таҳдид қилмаяпти. Айтганча, улар сайловларни хавфсизлик кафолатлари билан боғламаяпти”, — деди Зеленский.

Президент айтишича, референдум ўтказиш учун ҳам урушни тўхтатиш зарур. “Референдум ҳам тузилмаси жиҳатидан сайловга ўхшайди — хавфсизлик керак”, — деди у ва бу позиция Украина томонидан АҚШга анчадан бери маълум эканини қўшимча қилди.

Бундан олдин Financial Times газети номаълум манбаларга таяниб, Владимир Зеленский 24 феврал куни сайловлар ва референдум ўтказиш режалари ҳақида эълон қилиши мумкинлигини ёзган — гўё АҚШ босими сабаб буни 15 майгача қилиш талаб қилиняпти. Украина президенти идораси эса сайловларни эълон қилиш учун, энг аввало, уларни хавфсиз ўтказиш кафолатланиши шарт, деб таъкидлаган.