АҚШ собиқ элчиси Мединскийнинг музокараларга қайтишидан норози

АҚШнинг Москвадаги собиқ элчиси Майкл Макфол Россия делегациясига янги АҚШ–Россия–Украина музокараларида Россия президенти ёрдамчиси Владимир Мединский раҳбарлик қилиши ҳақидаги қарорни танқид қилди.

“Бу хабарни эшитганимдан хафа бўлдим. Менинг назаримда, жаноб Мединский — жиддий музокарачи эмас. У аввал ҳам музокарачи бўлган ва ҳеч қандай натижага эришмаган. Унинг қайтиши менга Путин бу музокараларга жиддий қарамаяпти, деган фикрни беради”, — деди дипломат Мюнхен хавфсизлик конференциясида DW мухбирига.

Аввалроқ янги уч томонлама музокаралар 17–18 феврал кунлари Женевада бўлиб ўтиши маълум бўлган эди.

Макфол АҚШ Россия ва Украинани июнгача тинчлик келишувига мажбурлаш учун уларга босим ўтказмоқчи экани ҳақидаги маълумотларга ҳам танқидий муносабат билдирди. Бу ҳақда бир неча кун олдин Володимир Зеленский айтган эди.

“Украинага босим ўтказиш — АҚШнинг миллий манфаатлари нуқтаи назаридан оқилона эмас. Нега биз доим Украинага босим қиламиз-у, ҳеч қачон Путинга эмас? АҚШ Россияга кўпроқ босим ўтказиши керак”, — дея қўшимча қилди дипломат. У, шунингдек, “Украинага кўпроқ қурол ва Россияга қарши кўпроқ санкциялар” жорий этишга чақирди.

Германия канцлери Фридрих Мерцнинг Мюнхен хавфсизлик конференциясидаги нутқи ҳақида Макфол шундай деди: “Бу Москвага муҳим хабар. Чунки кучлироқ Европа Украина учун устунлик бўлади. Мерц аниқ қилиб айтдики, узоқ муддатда бирлашган Европа — Путин Россиясига қараганда анча қудратли ва бой”.

“Бу жуда муҳим хабар эди. Европа — айтганча, Украина билан ҳамкорликда анча катта ҳарбий қудратга эга бўлиши мумкин, аммо ҳозирча бу даражага етмаган. Ва менинг назаримда, канцлер жуда кучли ишорани берди: агар Европа бирлашган бўлса, у Россиядан анча қудратли бўлиши мумкин эди. Аммо фақат у ҳақиқатан ҳам бирдам бўлса ва мамлакатлар мудофаа учун кўпроқ ресурс ажратса”, — дея хулоса қилди Макфол.