Германия мудофаа вазири: Россия бутун дунё учун таҳдид

Россия раҳбариятининг ҳаракатлари нафақат Европа минтақасига, балки бутун дунёга таҳдид солмоқда. Бу ҳақда жума куни, 13 февралда Мюнхен хавфсизлик конференциясида DW’га берган интервюсида Германия мудофаа вазири Борис Писториус билдирди.

“Ядровий тийиб туриш масаласида гап кетганда, иттифоқ ичида ишонч ва ишончлиликни йўқотмаслигимиз керак. Чунки Россия — глобал таҳдид. АҚШ буни ўз мудофаа стратегиясида тан олган, улар бу ҳақда очиқ ёзиб қўйган. Бу энди айримлар аввал айтганидек, фақат минтақавий таҳдид эмас — бу глобал таҳдид. Шуни инобатга олсак, бутунлай равшан: бизнинг умумий вазифамиз — ҳар доим тайёр туриш”, — деди Писториус.

Германия мудофаа вазири, шунингдек, ЕИ етакчилари Москвага нисбатан жорий этилган санкцияларга “танқидий назар” билан қараши кераклигини таъкидлади.

“Бизга, ҳақиқатан ҳам, уларни пулдан маҳрум қилиб, бу урушни тўхтатиш учун газ ва нефт сотишдан келадиган даромадларни тўсиб қўйиш зарур. Менимча, мақсад айнан шу”, — деб изоҳлади Писториус.

Берлин Германиядан Хитойга етказиб берилаётган, кейин эса Россияга борадиган икки хил мақсадда қўлланадиган товарлар (dual-use) бўйича ҳам санкциялар ҳақида ўйлаши керакми, деган саволга Германия мудофаа идораси раҳбари ижобий жавоб берди.

Борис Писториуснинг сўзларига кўра, Россия ҳокимияти тинчлик ёки ўт очишни тўхтатишдан манфаатдор эмас.

“Улар тинч аҳолига, фуқаролик инфратузилмасига ва Украинанинг энергетик инфратузилмасига қарши террористик ҳужумлар уюштиришни истайди. Гап унинг ҳудудидаги ҳарбий ҳаракатлар ҳақида эмас. Гап аҳолига қарши терроризм ҳақида кетяпти. Улар Украина руҳий-маънавий иродасини синдирмоқчи. Биз эса урушнинг шу даврида Украинани ҳар қачонгидан ҳам кўпроқ қўллаб-қувватлашимиз керак”, — деди немис сиёсатчиси.

Шу билан бирга, у Россия жанг майдонида “енгилмас эмас”лигини таъкидлади.

“Россия қуруқликдаги урушда у қадар муваффақиятли эмас. Улар ҳар ой 30–35 минг одамни йўқотяпти, бу рақам эса ошиб бормоқда. Бир пайтнинг ўзида улар ҳудудни бор-йўғи бир неча километргагина эгаллаб оляпти”, — деди Писториус ва айнан шу сабабли “Украинани қўллаб-қувватлашни давом эттириш жуда муҳим” эканини қўшимча қилди.