OpenAI раҳбари сунъий интеллектни зудлик билан глобал тартибга солишга чақирди

Жаҳон ҳамжамиятига сунъий интеллект (СИ) соҳасидаги саъй-ҳаракатларни мувофиқлаштириб борадиган, Атом энергияси халқаро агентлиги (АЭХА)га ўхшаш махсус халқаро орган зарур, деди OpenAI раҳбари Сэм Алтман. У бу фикрни пайшанба, 19 феврал куни Ҳиндистондаги халқаро СИ конференцияси — AI Impact Summit'даги чиқиши чоғида билдирди. Алтман таъкидлашича, бундай тартибга солувчи орган СИ имкониятлари ўсиши билан боғлиқ янги хавф-хатарлар ва ўзгаришларга тезкор жавоб бериш учун керак.

OpenAI раҳбарининг айтишича, СИ кенг оммага очиқ бўлган шароитда, масалан, янги патогенлар яратишга ёрдам бериши мумкин бўлган моделлар пайдо бўлиши муқаррар. Дунё бундан қандай ҳимояланишни ўйлаб чиқиши шарт, дея урғу берди Сэм Алтман. “СИни демократиклаштириш — инсоният фаровонлигини таъминлашнинг энг яхши йўли”, — деди у. Шу билан бирга, у “бу технологиянинг бир компания ёки бир мамлакат қўлида тўпланиб қолиши ҳалокатга олиб келиши мумкин”лигини ҳам қайд этди. Алтман фикрича, бунинг учун “бошқа қудратли технологиялардагидек” ҳимоя чоралари талаб этилади. Ана шу саъй-ҳаракатларни мувофиқлаштириш учун “дунёга АЭХАга ўхшаш нимадир керак бўлиши мумкин”, деди у.

Шу билан бирга, Сэм Алтман СИни демократлаштириш шошилинч тартибга солувчи чоралар ва ҳимоя механизмларига бўлган эҳтиёжни бекор қилмаслигини таъкидлади — инсонлар бошқа қудратли технологияларни қандай тартибга солса, худди шундай.

Генератив СИга бўлган кескин талаб ортидан кўп компаниялар даромадларини тез суръатда оширди, бироқ хавотирлар ҳам кучаймоқда — иш ўринларининг қисқаришидан тортиб, интернетда жинсий мазмундаги дипфейклар ва СИ орқали фирибгарликлар тарқалишигача. Алтман технологиялар меҳнат бозорини барибир ўзгартиришини тан олди, аммо қўшимча қилди: “Тарих шуни кўрсатадики, жамият ҳар сафар янги ва янада яхши бандлик шаклларини топган”.

Сэм Алтманнинг чиқиши тадқиқотчилар ва инсон ҳуқуқлари ҳимоячилари томонидан халқаро миқёсда янада қатъий ва мувофиқлаштирилган чораларга чақириқлар янграётган пайтга тўғри келди. 2025 йилда Европа Иттифоқида сунъий интеллектдан фойдаланиш қоидалари ва унинг шаффофлигига оид талаблар кучга кирди. Хусусан, инсонлар хавфсизлиги, соғлиғи ёки асосий ҳуқуқларига таҳдид солувчи СИ тизимлари тақиқланган. ЕИда бундай тизимларни ишлаб чиқувчилар ўз моделларининг ишлаш тамойиллари ва уларни ўқитишда қўлланган маълумотлар ҳақида ахборотни ошкор қилиши шарт.