Урушга қарши варақалар сабаб ҳукм қилинган шахс инфарктдан кейин вафот этди

Гатчинадан бўлган рассом Александр Доценко 12 феврал куни касалхонага ётқизилган ва сунъий комага туширилган, у ўта оғир аҳволда бўлган. Фақат икки кун ўтгачгина бу ҳақда унинг адвокати Сергей Подолскийга хабар берилган. Ҳимоячига номаълум рақамдан қўнғироқ қилишиб, Доценконинг қизига “у инфаркт ўтказгани, реанимацияда экани”ни етказишни сўрашган.

17 феврал куни Александр Доценкода тинчлантирувчи дорилар таъсири даражасини пасайтиришган. Қўллаб-қувватлаш гуруҳи унинг “бироз ҳушига кела бошлагани”ни, аммо аҳволи ёмонлашаётганини хабар қилган. Эртаси куни рассомнинг аҳволи яна оғирлашиб, уни қайтадан сунъий комага киритишган.

Федерал жазони ижро этиш хизмати ходимлари оила аъзоларига бу воқеа ҳақида хабар бермаган. Санкт-Петербургдаги Мариинский касалхонаси шифокорлари билан алоқада бўлган Доценконинг қизи ўлим ҳақида айнан шифокорлардан билгани айтилди, деб аниқлик киритади “Фонтанка” нашри.

Санкт-Петербургдаги Биринчи Ғарбий округ ҳарбий суди Александр Доценко ва унинг хотини — рассом Анастасия Дюдяевани “терроризмга чақириқлар”да айбдор деб топган. Сабаб: улар Ленинград вилоятидаги Таллин шоссесида жойлашган “Лента” гипермаркетига бориб, товарлар ёнига украин тилида шеърлар ва фикрлар ёзилган откриткаларни қўйиб кетган. Бу ҳақда “Медиазона” нашри 2024 йил 18 июл куни хабар берган.

Александр Доценко 3 йил колония жазосига, унинг хотини Анастасия Дюдяева эса 3,5 йилга ҳукм қилинган. Шунингдек, улардан принтер ҳам мусодара қилинган — “жиноят қуроли бўлиши эҳтимол қилинган буюм” сифатида.

Дюдяева ва Доценко 2024 йил 25 январ куни Ленинград вилоятидаги Тайци қишлоғида жойлашган уйларида ФСБ ва ОМОН иштирокида ушланган. Иш бўйича суд муҳокамаси (моҳиятан кўриб чиқиш) ўша йил 10 июн куни бошланган. Прокуратура айбланувчиларга ҳар бирига 4 йилдан умумий режимдаги колония тайинлашни сўраган.