Одессада РФ дронлари турар жойлар ва ўқув муассасасига зарар етказди

Одесса шаҳар ҳарбий маъмурияти (ШҲМ) раҳбари Сергей Лисак хабар қилишича, Россия дронлари ҳужуми оқибатида шаҳарда инфратузилма объектлари, турар жой бинолари ва ўқув муассасаси шикастланган. Жабрланганлар ҳақида маълумот берилмаган.

Фото: Nina Liashonok/REUTERS

Россия қўшинлари 21 феврал, шанбага ўтар кечаси Одессага яна бир бор оммавий дрон ҳужумини амалга оширди. Одесса шаҳар ҳарбий маъмурияти раҳбари Сергей Лисак маҳаллий вақт билан тахминан 02:00 атрофида Telegram’да шундай ёзди: «Душман Одессага дронлар билан ҳужум қилди. Шаҳарнинг турли туманларида инфратузилма, тўртта турар жой уйи ва бир ўқув муассасасига шикаст етгани маълум». У янада батафсил маълумот беришини қўшимча қилган.

Бундан олдин Украина Қуролли кучлари Ҳаво кучлари Telegram’да Россия дронлари Одесса томон йўл олгани, шунингдек Запорижжя, Днипропетровск, Суми ва Харкив йўналишларида ҳам учиришлар кузатилаётгани ҳақида огоҳлантирган.

Лисак 17 феврал кечаси ҳам шаҳарга оммавий ҳужум бўлганини билдирган: ўшанда инфратузилма объекти ва фуқаролик бинолари шикастланган. «Шаҳар туманларидан бирида турар жой биносининг юқори қаватларида ёнғин келиб чиқди. Бошқа туманда эса дўкон шикастланди. Икки нафар жабрланган бор», — деб ёзган у. Шаҳарнинг айрим қисмларида электр ва сув таъминотида узилишлар кузатилган.

Ўша кеча “Суспільне” телеканали Днипро шаҳрида портлашлар ва ёнғинлар ҳақида хабар берган. Шунингдек, Россия ўққа тутиши натижасида Суми вилоятидаги Ахтирка шаҳрида маъмурий бино ва транспорт воситалари ҳам шикастлангани айтилган.