Бектемир Мелиқўзиев рақибини техник нокаутга учратди

22 февралга ўтар кечаси ўзбекистонлик 29 ёшли боксчи Бектемир Мелиқўзиев (16-1-0, 10 KO) ганалик 34 ёшли Сена Агбекога (29-4-0, 23 KO) қарши рингга кўтарилди. АҚШнинг Лас Вегас шаҳридаги профессионал бокс оқшоми доирасидаги ушбу жанг еттинчи раундда техник нокаут билан якунланди.

Мелиқўзиев илк дақиқалардан ташаббусни қўлга олди. У майдон марказини назорат қилди ва чап қўлида мунтазам равишда зарбалар йўллади. Агбеко битталик кучли зарбалар билан жавоб қайтаришга уринди, аммо унга тезлик ва аниқлик етишмади.

Жанг ўрталарига келиб рингда ўзбекистонлик боксчининг устунлиги яққол кўзга ташлана бошлади. Мелиқўзиев корпус қисмига тинимсиз зарбалар йўллаш орқали рақибни ҳолдан тойдирди ва босимни оширди.

Ҳал қилувчи палла еттинчи раундга тўғри келди. Мелиқўзиев чап қўлда аниқ зарба йўллаб, ганалик боксчини полга қулатди. Рефери эса техник нокаут қайд этди.

Бу орқали у WBA Continental Americas камарини ҳимоя қилди. 

Шунингдек, у WBA веб-сайтида чемпионликка расмий даъвогар сифатида кўрсатилган. Ўйиндан кейинги интервюсида Мелиқўзиев иккинчи ўрта вазн тоифасида WBA чемпиони Хосе Армандо Ресендис чемпионлик камарини ҳимоя қилишини, WBA эса унга ушбу жанг ғолибига қарши чемпионлик жанги ваъда қилганини айтди.

Маълумот учун, айни пайтда Бектемирнинг ҳисобида проф боксда 18 та жанг мавжуд. Шундан 17 тасида (11 таси муддатидан аввал) ғалаба қозонган бўлса, бир бор мағлубиятга учраган.