Шифокор шамоллашнинг қайталаниш сабабларидан бирини айтди

Тиш чўткасидан ўткир респиратор касалликка чалинган  пайтда фойдаланиш давомида унда тўпланган бактериялар шамоллаш қайталанишига сабаб бўлиши мумкин. Испаниялик анестезиолог Давид Каллехо ана шундай фикр билдирди.

Мутахассиснинг таъкидлашича, тиш чўткалари шамоллаш, ич кетиши ёки оғиз бўшлиғидаги ҳар қандай инфекция вақтида патогенлар кўпайиши учун “ҳашаматли меҳмонхона”га айланади. Оғиздаги бактериялар тиш тозалаш жараёнида тиш қопламаси билан бирга чўтка толаларига ўрнашиб олади. Чўтка қанча узоқ муддат ишлатилса, унда бактериялар шунча кўп тўпланади.  

«Агар соғайгандан кейин тиш чўткаси алмаштирилмаса, касаллик қайталаниши мумкин. Инфекциядан кейин ҳам эски тиш чўткасидан фойдаланиш — гўё душ қабул қилиб, сўнг ифлос ичкийим кийиш билан баробар», — дея огоҳлантирди шифокор.

Каллехонинг сўзларига кўра, беморнинг тиш чўткаси бошқаларнинг тиш чўткалари билан бирга туриши ўзгаларга ҳам касаллик юқтириш хавфини оширади.