Мелания Трамп БМТ Хавфсизлик кенгашига раислик қилади

АҚШ президенти Доналд Трампнинг турмуш ўртоғи — Мелания 2 март куни БМТ Хавфсизлик кенгаши мажлисига раислик қилади. Бу ҳақда 26 феврал, пайшанба куни Х ижтимоий тармоғида АҚШнинг БМТдаги доимий вакили Майк Уолтц маълум қилди.

«Мелания Трамп АҚШ биринчи хонимаси сифатида илк бор Хавфсизлик кенгашига раислик қилади — Американинг кенгашдаги раислиги бошланган биринчи куннинг ўзида», — деб ёзди у. «БМТни яна буюк қиламиз!» — дея қўшимча қилди Уолтц.

Мелания Трамп идорасида унинг чиқиши «Можаро шароитида болалар, технологиялар ва таълим» мавзусига бағишланиши айтилди. У ерда таъкидланишича, асосий урғу таълимга — «бутун дунё бўйлаб бағрикенглик ва тинчликни илгари суриш усули» сифатида қаратишга берилади. Мелания Трамп аввалроқ Россиянинг Украинага қарши тажовузи давомида РФ томонидан олиб кетилган украин болаларини Киевга қайтариш тарафдори бўлиб чиққан.

Reuters келтиришича, БМТ вакили «бу 15 аъзодан иборат Хавфсизлик кенгаши мажлисига амалдаги жаҳон етакчисининг турмуш ўртоғи раислик қиладиган илк ҳолат бўлади», деб аниқлик киритган. Одатда Хавфсизлик кенгаши мажлисларига ротация бўйича мамлакат-вакилнинг элчиси ёки вазирлар маҳкамасининг юқори лавозимли аъзоси раислик қилади.

The Guardian газетаси шу муносабат билан АҚШнинг собиқ биринчи хоними Элеонора Рузвелт БМТда Инсон ҳуқуқлари умумжаҳон декларацияси лойиҳасини ишлаб чиқишга ёрдам берганини эслатган.

АҚШ президенти Доналд Трамп Оқ уйдаги биринчи муддатидан бошлаб БМТни очиқ танқид қилиб келади: у халқаро ташкилот самарасиз, уни ислоҳ қилиш керак, деб айтган. Reuters эслатишича, АҚШ БМТ бюджетига аъзолик бадаллари бўйича миллиардлаб доллар қарздор.

Брифингда «Мелания Трампнинг чиқиши ташкилот учун ижобий белги ҳисобланадими?» деган саволга жавоб берган БМТ бош котиби вакили Стефан Дюжаррик бу қадам АҚШнинг Хавфсизлик кенгаши ва унинг кун тартибига қандай аҳамият қаратаётганини «таъкидлаб турибди», деди.

Трамп ўтган ҳафта БМТга нисбатан янада ярашувчан риторикада чиқиш қилди. «Тинчлик кенгаши» амалда (деярли тўлиқ — таҳр.) Бирлашган Миллатлар Ташкилоти фаолиятини назорат қилади ва унинг тегишлича ишлашини кузатиб боради», — деди Трамп 19 феврал куни. «Биз БМТни мустаҳкамлаймиз. Унинг объектларини яхши ҳолатда ушлаймиз. Биз унга молиявий жиҳатдан ёрдам берамиз», — деб ваъда қилди у.

БМТ аввалроқ шу ойда АҚШдан тахминан 160 млн доллар (136 млн евро) миқдорида бадал келиб тушганини маълум қилган. Шу билан бирга, Вашингтоннинг бадаллар бўйича қарзи 4 млрд доллардан (3,3 млрд евро) ошиб кетган.