Ҳафта давомида ҳудудларда ёмғир ёғиши кутилмоқда

Иш ҳафтаси давомида Ўзбекистон бўйича баъзи жойларда ёмғир ёғади, дея хабар бермоқда Ўзгидромет.

Шимолий ҳудудларда фақат 3–4 март кунлари ёғингарчилик (ёмғир, қор) бўлади.

Ҳаво ҳарорати кечалари +3…+8 даража, республика шимолида –3…+2 даража, кундуз кунлари +10…+15 даража атрофида бўлади. Ҳафта ўртасида эса ҳарорат қисқа муддатга +7…+10 даражагача пасаяди. Шамол 7–12 метр/сония тезликда эсади.

2–6 март кунлари Ўзбекистоннинг тоғолди ва тоғли ҳудудларида вақти-вақти билан ёғингарчилик (ёмғир, қор), баъзи жойларда кучли бўлади. Сел-сув тошқин ҳодисалари юзага келиши мумкин, республиканинг тоғли ҳудудларида қор кўчиши хавфи бор.

Тошкент шаҳрида вақти-вақти билан ёмғир ёғиши кутилмоқда. Шарқий шамол йўналишини ўзгартириб, ғарбдан 3–8 метр/сония тезликда эсади.

Душанба ва сешанба кунлари кундузи ҳарорат +11…+13 даража бўлади. Кейинчалик ҳарорат асосан кечалари +4…+7 даража бўлади, кундуз кунлари +8…+10 даражагача пасаяди.