Hafta davomida hududlarda yomg‘ir yog‘ishi kutilmoqda

Ish haftasi davomida O‘zbekiston bo‘yicha ba’zi joylarda yomg‘ir yog‘adi, deya xabar bermoqda O‘zgidromet.

Shimoliy hududlarda faqat 3–4 mart kunlari yog‘ingarchilik (yomg‘ir, qor) bo‘ladi.

Havo harorati kechalari +3…+8 daraja, respublika shimolida –3…+2 daraja, kunduz kunlari +10…+15 daraja atrofida bo‘ladi. Hafta o‘rtasida esa harorat qisqa muddatga +7…+10 darajagacha pasayadi. Shamol 7–12 metr/soniya tezlikda esadi.

2–6 mart kunlari O‘zbekistonning tog‘oldi va tog‘li hududlarida vaqti-vaqti bilan yog‘ingarchilik (yomg‘ir, qor), ba’zi joylarda kuchli bo‘ladi. Sel-suv toshqin hodisalari yuzaga kelishi mumkin, respublikaning tog‘li hududlarida qor ko‘chishi xavfi bor.

Toshkent shahrida vaqti-vaqti bilan yomg‘ir yog‘ishi kutilmoqda. Sharqiy shamol yo‘nalishini o‘zgartirib, g‘arbdan 3–8 metr/soniya tezlikda esadi.

Dushanba va seshanba kunlari kunduzi harorat +11…+13 daraja bo‘ladi. Keyinchalik harorat asosan kechalari +4…+7 daraja bo‘ladi, kunduz kunlari +8…+10 darajagacha pasayadi.