Аёллар уйида тадбиркорлик қилиши учун “Даромадли аёл” дастури йўлга қўйилади

2026 йилда 1,5 миллион аёлни даромадли қилиш учун 25 триллион сўмдан зиёд ресурс йўналтирилади. Бу ҳақда президент Шавкат Мирзиёев Халқаро хотин-қизлар куни муносабати билан Кўксарой қароргоҳида ташкил этилган байрам тадбирида маълум қилди.

Қайд этилишича, ўтган йили хотин-қизларнинг бандлигини таъминлаш ва уларни тадбиркорликка жалб этиш мақсадида 23,5 триллион сўм кредит йўналтирилди, бунинг ҳисобидан 425 мингдан ортиқ хотин-қизлар тадбиркорликка жалб қилинди.

Мисол учун, тўқимачилик соҳасида 300 нафар аёлни банд қилган янгиариқлик Наргиза Бекмуратова ўтган йили иккинчи фабрикани очиб, яна 100 та иш ўрни яратган. У 2025 йилда Анқара шаҳрида ўтказилган халқаро танловда “Хотин-қизлар учун энг кўп иш ўрни яратган тадбиркор аёл” номинацияси ғолиби бўлган.

“Мен бундай серғайрат қизларимизни Янги Ўзбекистон бунёдкорлари деб биламан. Уларни ҳар қанча қўллаб-қувватлашга тайёрман”, деди президент.

Маълум қилинишича, 2026 йилда 166 минг хотин-қиз замонавий касб ва тадбиркорликка, яна 100 минг нафари эса ахборот технологиялари соҳасига ўқитилади.

Шунингдек, хотин-қизлар ўз уйида тадбиркорлик қилиши учун “Даромадли аёл” дастури бошланади. Бу орқали лидер тадбиркорлар кўмагида касаначилик, ҳунармандчилик, паррандачилик, асаларичилик ва томорқачилик йўналишларида 50 минг аёлнинг бандлиги таъминланади.

Бундан ташқари, “Ҳамроҳ” дастури доирасида хотин-қизларнинг 3 мингта лойиҳасига жами 1 триллион сўм ажратилади.

Умуман, 2026 йилда 1,5 миллион аёлни даромадли қилиш, шундан 400 минг нафарини бизнесга жалб этиш бўйича катта марра олинган. Ушбу мақсадлар учун 25 триллион сўмдан зиёд ресурс йўналтирилади.