Кремл Путин табригининг таҳрирланмаган версиясини эълон қилиб юборди (видео)

РФ президенти табрикни ўқиб бериш вақтида томоғи қичишиб қолганини айтиб, нутқни такроран ёзишни сўраган. Аммо Кремл матбуот хизмати видеони кесмасдан тарқатган.

Фото: Видеодан кадр

Кремл матбуот хизмати Владимир Путиннинг 8 март арафасида россиялик аёлларга йўллаган видеомурожаатини таҳрирланмаган шаклда эълон қилиб юборди.

8 мартга ўтар кечаси РФ президенти матбуот хизматининг телеграм-каналида 6 дақиқа-ю 19 сониялик хронометражли ролик пайдо бўлди. Видеода Путин табрик матнини икки марта ўқиб берган. У биринчи марта ўқишдан кейин томоғи ачишаётганидан шикоят қилиб, нутқини қайтадан ёзиб олишни сўраган ва йўтала бошлаган.

«Келинг, мен яна бир марта ўқиб бераман, чунки… Қичишиб қолди. Ҳа, қичишди. Йўталиб қолай дедим. Бугун жуда кўп гапиргандим», – деган Путин биринчи уринишдан кейин ва матнни яна қайтадан ўқишни бошлаган.

«Агентство» нашри эътибор қаратишича, видеонинг таҳрирланмаган версияси расмий телеграм-каналда тўрт дақиқа қолиб кетган. Кремл фақат 20 дақиқа ўтиб видеони 2 дақиқа-ю 52 сониягача қисқартириб, қайтадан эълон қилган.

Лекин бу вақт ичида роликнинг таҳрирланмаган версияси айрим идораларнинг телеграм-каналлари ҳамда ҳукуматпараст нашрларда репост қилиб бўлинганди. Кўп ўтмай улар ҳам эски видеони ўчириб, янгисини қўйишган. Шу билан бирга, айрим телеграм-каналларда биринчи версия сақланиб қолган.

Путин ўз чиқишларида тез-тез йўталиб туради, аммо 2024 йилги жонли мулоқот чоғида у буни кондиционерлар билан изоҳлаганди. «Кондиционерлар шовқин солмоқда», – деганди ўшанда у пропагандачи Александр Гамовнинг саволига жавоб бериш вақтида бироз йўталиб.

Кремлдагилар версиясига кўра, Путин ҳеч қачон касал бўлмайди ва деярли ҳеч қачон таътилга чиқмайди.