Россия Яқин Шарқдаги можарога аралашмаслиги керак – Ҳегсет

Фото: Reuters

АҚШ мудофаа вазири Пит Ҳегсет Россия Америка ва Исроилнинг Эронга қарши урушига аралашмаслиги кераклигини айтди.

Бу ҳақда у президент Доналд Трампнинг Россия раҳбари Владимир Путин билан телефон орқали мулоқотидан бир кун ўтиб маълум қилди, деб ёзди New York Post.

«Мен [суҳбатда] иштирок этмадим, лекин иштирок этганлар бу Россия ва Украинада тинчликка эришиш мумкинлигини, шунингдек, улар бу можарога аралашмаслиги кераклигини тасдиқлаган қатъий суҳбат бўлганини айтишди», деди Ҳегсет.

Аввалроқ, Трамп Путин Эрон билан урушни тўхтатишда «фойдали бўлишни истаса-да», унга «Украинадаги урушни тўхтатиш орқали кўпроқ фойдали бўлишингиз мумкин», деганини айтган эди.

Нашрнинг эслатишича, Эрон ва Россия узоқ вақтдан бери яқин иттифоқчи бўлиб келмоқда. Теҳрон Москвага 2022 йилда Россиянинг кенг кўламли босқини бошланганидан бери «Шоҳид» дронларини етказиб бермоқда.

Тайёрлаган Сардор Юсупов

#Россия #АҚШ #Эрон

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.