АҚШ Россия нефтига қарши санкцияларни вақтинча юмшатди

АҚШ 12 мартга қадар кемаларга юкланган Россия нефти ва нефт маҳсулотларини сотишни 11 апрелгача санкциялардан чиқарди. Тегишли битимларни амалга оширишга имкон берувчи лицензия 12 март, пайшанба куни мамлакат Молия вазирлиги сайтида эълон қилинди.

Идора раҳбари Скотт Бессентнинг сўзларига кўра, президент Доналд Трамп бундай қарорни АҚШ ва Исроилнинг Эрон билан уруши фонида “жаҳон энергетика бозорларида барқарорликни таъминлаш ва нархларни паст сақлаб қолиш” учун қабул қилган. Вазир X ижтимоий тармоғидаги постида таъкидлашича, бу “тор доирага мўлжалланган, қисқа муддатли чора” Россия ҳукуматига “сезиларли молиявий фойда” келтирмайди, чунки у энергия ташувчилардан тушадиган даромаднинг асосий қисмини қазиб олиш жойида ундириладиган солиқлар ҳисобига олади. Бессент нефт нархларининг ўсишини “қисқа муддатли ва вақтинчалик узилиш” деб атади, бу узоқ муддатли истиқболда АҚШга “улкан фойда” келтиришини айтди.

Fox News маълумотига кўра, 12 март ҳолатига дунё бўйлаб 30 та турли нуқтадаги танкерларда Россияга тегишли тахминан 124 миллион баррель нефт бор. Телерадиокомпаниянинг таъкидлашича, Эрон томонидан тўсиб қўйилган Ҳўрмуз бўғозида ҳар куни йўқотилаётган ёнилғи ҳажмини ҳисобга олганда, бу 5–6 кунлик таъминот учун етади.

Бундан олдин, 6 март куни Бессент Вашингтон Ҳиндистонга денгиздаги танкерларда турган Россия нефтини 30 кун давомида сотиб олишга рухсат берганини айтган эди. 10 март куни эса Трамп матбуот анжуманида Россияга қарши санкцияларни вақтинча юмшатиш эҳтимолига ишора қилган. “Биз нархларни пасайтириш учун нефт билан боғлиқ санкциялардан бир муддат воз кечамиз. Айрим давлатларга нисбатан санкцияларни тўхтатиб турамиз. Ва, эҳтимол, агар вазият тинч бўлса, кейин уларни қайта тиклашга ҳам тўғри келмас”, — деган эди ўшанда АҚШ президенти.

Шу билан бирга, 11 март куни G7 давлатлари Эрон билан уруш фонида Россия нефтига қарши санкцияларни бекор қилмасликка келишиб олганини эълон қилди. Орадан бир кун ўтиб, АҚШ энергетика вазири Крис Райт Россияга нисбатан санкцияларни юмшатиш режалаштирилмаётганини билдирди.

Шунга қарамай, уруш фонида нархлар ошиши оқибатида АҚШнинг ўзи ҳам стратегик захирадан нефт чиқаришга мажбур бўлди. 12 март куни АҚШ Энергетика вазирлиги мамлакат 172 миллион баррел нефт тақдим этишини маълум қилди. Бу қадам Германияни ҳам ўз ичига олган 32 давлатни бирлаштирувчи Халқаро энергетика агентлиги олдидаги мажбуриятни бажариш ҳисобланади. Ташкилот режасига кўра, иштирокчи давлатлар жами 400 миллион баррел нефт чиқариши керак.