Киев Эрон, РФ ва Россия паралимпиячиларига қарши санкциялар киритди

Украина Россиянинг ҳарбий-саноат мажмуасига хизмат қилаётган Россия ва Эрон компаниялари ҳамда фуқароларига, шунингдек, Россиянинг тажовузини оқлаётган россиялик паралимпиячиларга қарши янги санкциялар жорий қилди. Украина президенти Володимир Зеленский Миллий хавфсизлик ва мудофаа кенгаши (МХМК)нинг тегишли қарорларини ўз фармонлари билан кучга киритди. Бу ҳақда 15 март, якшанба куни унинг офиси хабар берди.

Санкция рўйхатига Украина ҳарбий-саноат мажмуаси билан боғлайдиган 130 нафар жисмоний ва 48 нафар юридик шахс киритилди. Улар орасида Россия дронлари, қанотли ва баллистик ракеталари, бошқариладиган ўқ-дорилари ҳамда самолётларида қўлланадиган “Комета” сериясидаги сунъий йўлдош навигация ускуналари ишлаб чиқариш учун бутловчи қисмлар етказиб беришга алоқадор компаниялар ҳам бор. Чеклов чоралари, шунингдек, “Орешник” ракета мажмуаси ишлаб чиқаришида иштирок этаётган корхоналарга ҳам нисбатан қўлланди.

Бундан ташқари, рўйхатга Эрон дронлари ва ракеталарини ишлаб чиқариш билан боғлиқ компаниялар ва фуқаролар, шунингдек, Россия ҳудудида Shahed дронларини ишлаб чиқаришни йўлга қўйиш ва кенгайтиришга ёрдам берган шахслар ҳам киритилди. Киев маълумотларига кўра, ушбу дронлар билан Украина шаҳарлари ва энергетика объектларига ҳужум қилган Россия операторларини тайёрлаган эронлик инструкторлар ҳам санкциялар остига олинган.

Президентнинг санкция сиёсати масалалари бўйича вакили Владислав Власюк Россия ва Эрон ҳарбий-саноат мажмуалари аллақачон ўзаро узвий боғланиб кетганини таъкидлади.

“Ушбу санкция пакети билан биз Украинага қарши Россия ва кўплаб мамлакатларга қарши Эрон ҳужумларида қўлланаётган зарба воситаларини ишлаб чиқаришга жалб этилган асосий иштирокчиларни кўрсатмоқдамиз. Дунё бу таъминот занжирларини, жумладан, муҳим бутловчи қисмлар етказиб бериш йўлларини узиш ва бу ҳамкорликка самарали қарши туриш учун анча кўпроқ иш қилиши керак”, — деди у.

Чеклов чоралари жорий этилган россиялик паралимпиячилар Россиянинг Украинага қарши урушида иштирок этган, Россия тарғиботини тарқатган ва спорт тадбирларидан Россия жиноятлари ҳамда босиб олиш сиёсатини оқлаш майдони сифатида фойдаланган, дейилади Зеленский офиси сайтида.

Рўйхатга қуйидагилар киритилган: Николай Бондаренко, Антон Бушмакин, Ринат Василев, Циден Генинов, Денис Ишбулатов, Ростислав Костенко, Рустам Сайфуллин, Руслан Устюжин, Владислав Шинкар, Иван Ширяев.