Трамп Эрон билан урушнинг дастлабки натижалари ҳақида ҳисобот берди

Эрон билан можаро бошланганидан бери Қўшма Штатлар бутун мамлакат бўйлаб 7 мингдан ортиқ нишонга зарба берди. Бу ҳақда АҚШ президенти Доналд Трамп маълум қилди.

Унинг сўзларига кўра, зарбалар асосан «ҳарбий ва тижорат объектларига» берилган. Шунингдек, Эроннинг миналаштирадиган барча кемалари йўқ қилинган ва мамлакатда энди «унчалик кўп ракета қолмаган».

Президент яна бир бор Эроннинг Харқ оролини тилга олиб, АҚШ у ердаги нефт объектларидан ташқари ҳамма нарсани «том маънода йўқ қилганини» айтди. Шунга қарамай, у келажакда бундай зарбалар берилиши мумкинлигига йўл қўйди.

«Биз фақат қувурларни қолдирдик. Биз буни қилмоқчи эмасдик, лекин биз буни қиламиз, буни беш дақиқа ичида қилишимиз мумкин», деди Трамп.

Унинг сўзларига кўра, АҚШ «қачондир бу мамлакатни қайта тиклаш мақсадида» атайлаб бу ҳудудларни четлаб ўтган.

«Ўйлашимча, биз тўғри иш қилдик, аммо бу ўзгариши мумкин», деб қўшимча қилди сиёсатчи.

Трамп можаро бошланганидан кейин Эрон ёпиб қўйган Ҳўрмуз бўғози орқали нефт ва бошқа ёқилғи етказиб беришдаги узилишлар ҳақида гапирар экан, бу транспорт артерияси орқали АҚШга нефтнинг 1 фоиздан камроғи импорт қилинишини таъкидлади.

Шу билан бирга, у бошқа давлатлар, жумладан, Вашингтон билан иттифоқчи Япония ва Жанубий Корея Ҳўрмуз орқали таъминотга кўпроқ боғлиқлигини тан олди. Шунинг учун АҚШ уларнинг ўз ҳарбий кучларини йўналтиришини ва бўғоз орқали хавфсиз кема қатновини таъминлашга ёрдам беришини истайди, деди Трамп.

АҚШ президенти хавфсизликни таъминлаш бўйича қўшма миссия доирасида кемаларни Ҳўрмуз бўғозига юбориш ҳақидаги чақириқларини рад этган иттифоқчиларни қоралади. У ўнлаб йиллар давомида Америка томонидан хавфсизлик соҳасида қўллаб-қувватланганига қарамай, уларнинг АҚШга содиқлиги етарли эмаслигини айтди. Аввалроқ АҚШ президентига Германия, Швеция ва Финляндия рад жавобини берганди, The Telegraph эса Буюк Британия ҳам худди шундай позицияни эгаллаганини таъкидлаганди.

Бироқ «кўплаб давлатлар», Трамп сўзларига кўра, «аллақачон йўлда эканлигини» билдирган. У қайси давлатлар ҳақида гапираётганига аниқлик киритмади.

Трамп Эрон танкерларга ҳужум қилишда давом этаётганига қарамай, эҳтимолий ҳарбий-денгиз миссиясини «умуман аҳамиятсиз нарса» деб атади. У иттифоқчилар Қўшма Штатларни қўллаб-қувватламаслигини олдиндан билганига ишонтирди.