ЕИ Бучадаги қотилликлар учун масъул шахсларга қарши санкциялар жорий қилди

Янги чеклов чоралари остига, ЕИ маълумотларига кўра, 2022 йилда Бучада содир этилган қотилликларга алоқадор бўлган тўққиз нафар Россия ҳарбийси тушди. Шунингдек, Украинага қарши урушни қўллаб-қувватлаб келаётган тўрт нафар журналист ва блогерга қарши ҳам санкциялар жорий этилди.

Фото: AFP

Европа Иттифоқи 2022 йилда Украина Киев вилоятидаги Буча шаҳрининг Россия томонидан босиб олиниши пайтида содир этилган ҳарбий жиноятларда айбланаётган тўққиз нафар шахсга, шунингдек Россиянинг гибрид фаолиятига алоқадор бўлган тўрт нафар шахсга нисбатан санкциялар жорий қилди. Бу ҳақда ЕИ Кенгаши 16 март, душанба куни хабар қилди.

Европа санкциялари остига, жумладан, Россия Шарқий ҳарбий округининг собиқ қўмондони, генерал-полковник Александр Чайко ҳам тушди. ЕИ Кенгаши пресс-релизида айтилишича, у 2022 йилда Россия қўшинлари Бучага кирган пайтда Украина ҳудудидаги «энг юқори лавозимли россиялик ҳарбий» бўлган.

Янги рўйхатга, шунингдек, «тажовузнинг дастлабки кунларида Украинада Россия қўшинларига қўмондонлик қилган ва Буча ҳамда қўшни Хостомел, Ирпен ва Бородянка каби ҳудудлар аҳолисига қарши шафқатсизликлар содир этган» бошқа юқори лавозимли Россия ҳарбийлари ҳам киритилди. Улар орасида полковник Андрей Кондров, полковник Артём Городилов, генерал-майор Сергей Чубарикин ва бошқалар бор.

Қайд этилишича, уларнинг барчаси «юзлаб тинч аҳоли ўлдирилган, айрим ҳолатларда эса шафқатсиз қатллар амалга оширилган бир пайтда ўз бўлинмаларига раҳбарлик қилган». Уларга бўйсунувчи қўшинлар «шунингдек талон-торож, қийноқлар ва тинч аҳолини ҳалок бўлган россиялик аскарлар жасадларини йиғишга мажбурлаш» ҳолатларида ҳам иштирок этган.

Шу билан бир вақтда, Европа Иттифоқи ЕИ Кенгаши фикрича, Россиянинг Украинага қарши урушини оқлашга қаратилган тарғибот ва дезинформацияни тарқатишда иштирок этаётган тўрт нафар шахсга нисбатан ҳам чеклов чораларини жорий қилди.

Гап «Россия-1» телеканали бошловчиси Эрнест Мацкявичюс, блогер ва радио бошловчиси Сергей Ключенков (Сергей Мардан тахаллуси билан чиқиш қилади), шунингдек Россия босқинини қўллаб-қувватлаётган Британия фуқароси Грэм Филлипс ва Россия фуқаролигини олган собиқ француз ҳарбийси Адриан Боке ҳақида кетмоқда.

ЕИ Кенгаши пресс-релизида кўрсатилишича, ушбу тўрт нафар тарғиботчи «Россиянинг давом этаётган гибрид фаолияти, хусусан, хорижда ахборотни манипуляция қилиш ва ЕИ, унинг аъзо давлатлари ҳамда ҳамкорларининг ишларига аралашиш» учун масъул ҳисобланади.