Венчур ва хусусий инвестиция фондлари учун ҳуқуқий асос яратилади

Ўзбекистонда муқобил инвестиция фондларини ташкил этиш, бошқариш ва тугатиш, шунингдек, фаришта инвестицияларни амалга ошириш билан боғлиқ муносабатларни тартибга солишга қаратилган қонун лойиҳаси ишлаб чиқилди.

«Муқобил инвестиция фондлари тўғрисида»ги қонун лойиҳасида венчур фондлари, хусусий инвестициялар фондлари, фондлар фонди, инвестиция ширкатлари ва бизнес-фаришталар фаолияти учун ҳуқуқий асосларни белгилаш назарда тутилган.

Лойиҳага кўра, муқобил инвестиция фондлари фақат малакали инвесторлар маблағлари ҳисобига шакллантирилади ва улар қимматли қоғозлар уюшган бозорида муомалада бўлмаган акциялар, иштирок этиш улушлари ҳамда бошқа активларга инвестиция киритади.

Ҳужжатда венчур фондларининг инновацион лойиҳаларни амалга оширувчи, ривожланишнинг дастлабки босқичларидаги юридик шахсларга сармоя йўналтириши, хусусий инвестициялар фондлари эса амалдаги компанияларга тўғридан тўғри инвестиция киритиши белгиланган.

Шунингдек, қонун лойиҳасида бизнес-фаришталарнинг ҳуқуқий мақоми, уларнинг инвестиция киритиш ҳуқуқлари, конвертация қилинадиган қарзлар ва келгусида улушни сотиб олиш тўғрисидаги битимлар каби янги молиявий инструментлар ҳам мустаҳкамланмоқда.

Ҳужжатда муқобил инвестиция фондларини давлат реестрига киритиш, бошқарувчи компанияларни лицензиялаш, инвесторлар ҳуқуқларини ҳимоя қилиш, аудит ва назорат механизмларини жорий этиш ҳам назарда тутилган.

Қонун лойиҳаси қабул қилиниши венчур ва хусусий капитал бозорини ривожлантириш, инновацион лойиҳаларни молиялаштириш имкониятларини кенгайтириш ҳамда мамлакатнинг инвестиция муҳитини янада такомиллаштиришга хизмат қилиши кутилмоқда.