Путин йирик бизнесга урушни молиялаштиришни таклиф қилди

Россия президенти Владимир Путин йирик бизнес вакиллари билан ёпиқ учрашувда уларга Украинага қарши урушни молиялаштириш учун бюджетга ихтиёрий бадал киритишни таклиф қилди. Бу ҳақда 26 март, пайшанба куни The Bell нашри манбаларига таяниб хабар берди.

Фото: AP

Манбалар сўзларига кўра, Россия саноатчилар ва тадбиркорлар иттифоқи қурултойи кулуарларида бўлиб ўтган учрашувда Путин урушни давом эттириш ва Россия армиясини Донецк вилоятининг маъмурий чегарасигача илгари суриш ниятида эканини айтган. Шундан кейин у бизнесменларга бюджетга ихтиёрий бадаллар киритишни таклиф қилган. The Bell суҳбатдошлари Путин нутқининг мазмунини “уришамиз, деган гап бўлди” ва “Донбасс чегараларигача борамиз” деган иборалар билан тасвирлаган.

Нашр манбалари таъкидлашича, бу ташаббус “Роснефть” раҳбари Игор Сечинга тегишли. У учрашув арафасида Путинга “мамлакат учун оғир паллада бизнесни силкитиш” ғояси баён этилган мактуб йўллаган. Маблағ жалб қилиш механизми сифатида ҳарбий федерал заём облигацияларини жойлаштириш таклиф этилган.

The Bell'нинг икки суҳбатдоши бизнесмен Сулаймон Керимов дарҳол бу илтимосга рози бўлгани ва бюджетга 100 миллиард рубл киритишга ваъда берганини тасдиқлаган. Нашр ёзишича, исми очиқланмаган яна бир йирик тадбиркор ҳам Путин таклифини қўллаб-қувватлаган.