Эрон Исроилдаги кимё заводига зарба берди

Завод ишчилари эвакуация қилинган. Хавфли моддалар билан ишлаш бўйича махсус гуруҳ саноат ҳудудида зарарли моддалар тарқалиши хавфини баҳоламоқда.

Фото: Ижтимоий тармоқлар

Эроннинг ракета зарбаси натижасида Исроил жанубидаги Неот-Ховав саноат ҳудудида жойлашган кимё заводида ёнғин юзага келди, деб хабар берди Ynetnews.

Хабар қилинишича, завод ишчилари эвакуация қилинган. Хавфли моддалар билан ишлаш бўйича махсус гуруҳ саноат ҳудудида зарарли моддалар тарқалиши хавфини баҳоламоқда.

Исроилнинг Maariv газетасининг ёзишича, воқеа жойига хавфли моддалар билан ишлаш бўйича учта гуруҳ жўнатилган.

Calcalist нашри саноат ҳудуди атрофидаги корхоналар ёпилгани ҳақида хабар берди. Нашрга кўра, Неот-Ховавда ўнлаб йирик фабрикалар бўлиб, уларда минглаб ишчилар ишлайди.

Fars агентлигининг ўз манбаларига таяниб хабар қилишича, Эрон Исроилнинг ҳарбий саноатга алоқадор заводига зарба берган.

Неот-Ховав саноат ҳудуди Исроил кимё саноатининг муҳим маркази ҳисобланади. Мамлакатда ишлаб чиқариладиган барча кимёвий моддаларнинг қарийб ярми шу ерда ишлаб чиқарилади.

Тайёрлаган Дилшодбек Асқаров

#Эрон #Исроил #кимё заводи

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.