“Бунёдкор” — “Локомотив” ўйинидан кейинги жанжал сабаблари ўрганилмоқда

Ўзбекистон Суперлигаси 5-туридан ўрин олган “Бунёдкор” — “Локомотив” учрашуви якунлангач, микст-зона яқинида икки клуб футболчилари иштирокида жанжал келиб чиқди. Унда клублардан икки нафар вакил енгил тан жароҳати олган.

Фото: ЎФА

Миллий гвардия вазиятга яқин эканлигидан келиб чиқиб, можаро тезда бартараф этилган. Ички ишлар органлари таянч пунктида ўтказилган суриштирувда томонлар бир-бирига нисбатан даъвоси йўқлигини маълум қилган.

“Мазкур ҳолат Комиссар томонидан баёнлаштирилган. Шундан келиб чиқиб, Лига вазиятни тўлиқ ўрганиш мақсадида Ассоциация қошидаги Футбол фаолиятини назорат қилиш бўйича махсус инспекцияга расмий мурожаат қилди. Айни вақтда инспекция можаро иштирокчилари билан суҳбат ўтказиб, Бунёдкор стадионида рўй берган ҳолатни стадион камералари тасвирлари, Комиссар билдиргиси ва албатта учрашув давомида рўй берган кичик тўқнашув ва эпизодлар ёрдамида ўрганмоқда. Ўрганиш ишлари якунлангач, инспекция ҳолатнинг келиб чиқиш сабаблари ва унинг оқибатлари тўлиқ баёнлаштирилган материални Лигага тақдим этади”, дейилади Ўзбекистон ПФЛ хабарида.

Қайд этилишича, Лига тайёр материални Тартиб-интизом қўмитасига оширади ва можаронинг ҳар қандай иштирокчиси спортчиларга хос бўлмаган ҳаракатлари учун тегишли тартибда жазоланишини таъминлайди.

2 апрел куни бўлиб ўтган учрашувда “Бунёдкор” “Локомотив” устидан 2:0 ҳисобида ғалаба қозонганди.